ناس خالتى عندهم خطوبة … رسولونى اجيب تلج … بس جيت داخل البيت كده ..اشوف ليك زول من بعيد ..بجهر عديل كده.. بجججهر….!!! ده شنو ده ياخوانا ده من وين دى جات…!! بت ذي اللمبة …كتاحة وكتحتنا ..!!! .سماحة الجن والجنبو ( الجن عرفنا انتو القاعد جنبو ده منو!!؟؟؟ ) …ياخ ماعلينا خلّوونا فى المهم… البت نجفة بس …!! لا لا لا ده شنو ده ده …!!! عيون ذاتا تحير لاتعرفن كبار ولا صغار ولا متوسطات ولا نايم ولا صاحى ولاهو ذاتو فى شنو …..!!! وضحكة كده عجيبة غريبة … هى ماضحكة كاملة ضحكة ..بى زاوية منفرجة …!! ابتسامه كده مع شوية (سنينات ) بظهرو مره مره ..برق فى مطرة …!! آمنت بالله ….لوح التلج ذاتو ساح فى يدى …!! ده كلو كوم ولا لمن هى بتسمع فى البت الجنبها …بس مسلسل تركى مدبلج لانو انت أصلا بتكون مركز فى البطلة الكلام جاى من وين مامعروف ..الكلام يطير ياخ … !!بس يازول قلت انا لازم أتكلم مع البت دى مافى اى طريقة ..!! لكن دى هسه يقولو ليها شنو ذاتو …!!؟ ازيك ممكن نتعرف ..!!! لا لا دى تكون( عباطة ) منك ساكت يابو علوه ….!! أها ياربى ….والله انا مشبهك ….!! لا لا قدييييمة وبعدين دي يشبهوها على منو دى ذاتا… دى تشبه روحا ….!!! ايوااا بسس أقول ليها ياخ انت سمحه لمن بهناك والله… وعجبتينى شديد بس عايز أقول ليك الكلام ده وقصدى شريف …والحى الله والكاتل الله …ايواااا ….بس الفكرة الاخيرة دى كويسه …!! اااي فيها شنو يعنى…زوله عجبتك وعايزين نعبر..!! مانعبر يعنى ولاشنو …!!؟ عيب ولا ممنوع ..!! وبعدين ذاتنا غرضنا شريف …!! هو ذاتو البنات بتبسطو لجنس الشكير ده …!! بس خلاص قررت ..!!! لكن كيف هسه بس امشى كده ذي المجنون أقول كلامى ده وابقى مارق …!! افرض عاينت لى كده وماعبرتنى بى كلمة …أطير وين انا ..هى ياخوانا لكن العمل شنو هسه ..والله ياخوانا اخدت ليها لفتة (جنباوية ) كده …..( أشهد أن لا إِله الا الله) ..دى سماحة شنو دى ..!! البت دى أكيد جنيه ..!!!
خلااااص دقت ساعة العمل ….!! دقت ساعة الزحف ….!! يازول بس جمعت ليك كل قوتى ..وعضيت سنونى شديد ..واخدت لى نفس طويل ..وقررت الاقتحام …..!!!
اها …المسافة بيناتنا مابعيده… لاكين فى اللحظة ديك بقت لى بس شارع مدنى .. ..!! المهم وانا ماشى كده
وخلااااص قربت أصل ..أشوفها ليك قامت على حيلا …( لوفتهانزا واستعدلت ) اها ياخوانا ده حامد زوجى اتصل على قال هو بره استأذن انا …!! الوقت ده انا خلاص وصلتها …!! و من غير ما اشعر قلت ليها ..اااااى حامد ده بره وراجيك …!! اتخيلو قالت لى شكرًا ليك…. ايوه انا طالعة ليهو …!! هيي ياجماعة …!! افتكرت حامد مرسلنى….!! حامد يرسلوا للسجن ( ان شاء الله ..)ماعافى ليك اااحامد…!!
وتانى مافي زول يقول لى شكرًا مدى الحياة …!! ليك حق يسموك حامد ..!! تحمد بس ..!!
ونحن لينا (الله) …..!! والبركة فى شكرًا دى ….!! وياحليلك ياعلوب يالمشيت تختار وجيت مرسال ..!! والمرسال مشى وماجا …!! تجيك الكشة ياعلوب ….
ياسلااااام ياخ حقيقه اسلوب ممتع حتى النخاع واعادنا للأيام الجميله
حقيقه عمل رآئع يشجع على المتابعه وسنحرص على ذلك
اكثر من ممتع والله
ياخ انت ضحكتنا في الغربة النار دي
اضحك الله سنك يا علوب اقصد الطيب عبد الماجد…
اسلوب السهل الممتنع .كل حكاويك تتحدث عني … كانك تتحدث بلساني.. والله امتعتنا التحية ليك من هنا ليييييييعندك اينما كنت..