“يوميات علوب” (39) … فوزية فى العملية

مرت جيرانا كده اسمها فوزيه جات للحاجه تتونس معاها ( انتو ليه نحنا بنقول مرت جيرانا ) هو (جيرانا ) ده راجل (المره ) دى ولا شنو …!!! ماعلينا …!! المهم انو فوزيه جات ….اها فوزيه دى قطااااعه جنس قطيعة ….القطيعة دى عندها ليها طقوس ….النوع داك البقطع بالقهوة ..صدقو امى دى غايتو العاجبنى فيها شديد… شديد..انو ماعندها القطيعة دى واصلو مابتتكلم فى الناس يعنى أقصى قطيعة ليها لو خلاص بالغت بتشجب وتدين …(والرسول يامشاعر انت ناس فلانه ديل مالم مابحمدو لى سلامة فاطمة …) بس ده السقف بتاعا…. لكن طبعا باقى
الحاجات كلها متوفرة …يعنى جنها ملايات …!! تعشق العده ….!! الدهب بكسرا كسير…!!! بيت البكا وبيت العرس
مشيتم مقدسه ..!! وشوية مستشفيات …!! وبتبكى مع المسلسلات والافلام ..!! بس القطيعة دى ماشايلاها…!! لكن كمان بتخجل كده… تسمع مجبوره وهو اضعف الإيمان …اما جارتنا السيد فوزيه فدى عندها دكتوراه فى القطيعة تحبها ذي عيونا وهى ذاتا عندها مقدرات تمثيلية مدهشة احيانا تتقمص شخصية (المقطوع فيه ) تحلف تقول ده هو …لكن والله النصيحه هى مره كده لذيذه وحاكايا وبتاعة درامات وجنها ضحك …بس كان خلت القصة دى …!! اها انا اليوم داك جيت مارق من الاوضه لقيتا مع امى سلمتا عليها …طوالى شبكتنى …هيا علوبه (بتقول لى علوبه ) كيفك وين اليومين ديل ماشايفنك …تقيت ولا لقيت ..!! قلتا ليها هسه انا كان تقيت كان سلمتا عليك …ماكان جليتك عااادى …بى ضحك كده ..اجشش …انشاءالله يوم لقاك مايجى ..امى طبعا رغم انو كل الكلام ده كلو بالهزار وهى عارفانا .(.لكنه قلب الام العظيم …) قالت ليها تفى من
خشمك يافوزيه علوب يتعلا مايدلا …ان شاءالله اليلقاهو علوب الله وخلقو يتفرجو …علوب يايمه ماخد رضاى …فوزيه
غايتو بى حركة درامية كدا عوجت خشما وقالت سممح سكتنا ..!!اريتو يشبه ابو ..!! غايتو ضحكنا كده وانا طلعت …اها فوزيه طبعا خشما أكلا دايرا تقطع …طوالى ماخلتنى مرقتا كويس ..وانا لفيت دخلتا المطبخ وهى ماشايفانى بس انا سامعا ..ودورت ليك …واستلمت امى …اصبرى ياختى انتى عواطف مالا بتعمل كده …!! امى قالت ليها مالا ..؟قالت ليها ماشايفاها اليوم داك فى بكى ناس السيده …الدهب يايمه والغوايش والحلق …فى شنو …!!؟؟
ماعارفه روحا جايه بيت البكا …! امى قالت ليها مايمكن جايه من مناسبه وغشت تعزى …هيي ها انت كمان مسكينه وعلى نياتك مناسبة شنو كمان ( اصرار على التوريط ) قسمتا بالله قاصداها وجايه تتفشخر وتورينا …عليك
الله ها ..بعدين انتى شفت التوب المطرز …امى كمان قالت ليها والله ذكرتينى انتى التياب دى بتجيبا من وين غايتو توب السرور …!! اها نوع الكلام ده بزهج فوزيه عايزا ليها مستمع جيد يساعدا بى الباصات وهى تجيب القون …وواصلت التقدم نحو المرمى وقصفت الجبهه …!! واصبري لى …هى اليومين ديل الله فاتحا عليهم أظنو راجلا (المدقلم ) ده هبش ليهو هبشه هبشتين …اها امى هنا بتخاف عديييل قالت ليها استغفر الله من حقو ..عليك الله مالنا ومالن ..كل زول بياخد قسمتو فى الدنيا دى ..ده كلو وفوزيه الليله مزاجا مزاج قطيعة مادايرا تقيف …غايتو الدنيا كتر خيرا …عواطف المابتشبه النسوان بقت تتفسح فينا حلات كمان بتحكى وتنعم فى صوتا ..والله عباس (عباس ده راجل عواطف ) عباس اليومين ديل مفكر يسوقنا القاهره اجازه ..مخير الله …الإجازة يايمه كنتى بتمشى بيها (زلطه ) (زلطه دى بلد ناس عواطف ) ( عليكم الله شوفو المره المابتخاف الله دى وصلت لحدى زلطه ) ..وهى لِسَّه مواصله رغم انها لاعبه بى عشره لاعبين ..امى غايتو بس مجبوره تسمع …!!!! اها بسس قلتا الليله فوزيه دى توبتا على يدى ..طوالى اتسحبتا برااحه وجرى على مشاعر فى الاوضه التانيه ….دى كمان اليومين ديل داخله ليها فى برنامج جديد حاجه كده اسمها (كاريوكى ) تطبيق كده فى التلفون بخليك تغنى مع فنانك المفضل ..اها لقيتا مركبا ليك السماعات واليدين ديل فى السما تغنى بى صوتا الشين ده وتقلب فى عيونا ومندمجه …خلاااص البت (شيرين ) غايتو جنس منظر …اها قطعت ليها احلاما دى لما زهجت …!! رمت السماعه ….!!فى شنو ياعلوب ..!!
قلتا لا بس عايزنك توقعى لينا …!! عليك الله امرقى من الشخصيه دي ..انت ماشفت منظرك بى قدومك ده …اها دخلتا ليها فى الموضوع وحكيت ليها ….قلتا ليها قناة فوزيه الفضائيه شغاله بره والليله برنامج عواطف …عليك الله يامشاعر بس انت اتلفلفى بالملايه السودا دى ولفى راسك اعملى فيها منقبه عديل انا بطلع بره أقول لى امى انت
عواطف دى انتقبت ولا شنو ..!! داير فوزيه تعرف انو عواطف معاك فى الاوضه وسمعت القطيعة دى كلها وتعالى مارقه بى نقابك ده ..طبعا كمان مشاعر نوع الكلام ده اهم ليها من شخصية (شيرين ) الكانت داخلا فيها دى …والله الساعة الاتلفلفت ليك انا قايلا عواطف جد جد لما اتكيفتا ..بس وانا سبقتها على الصاله لتنفيذ المخطط ..ولقيت ليك فوزيه بتختم بى انو عواطف كانت بتشيل عدتا ومابترجعا…وانا أعجبكم جيت طالع كأنى ماعارف حاجه ….!! قلتا لي امى (وديك طبعا قاااعده تسمع ) انتى عواطف دى ماجاتك..!! ليه خالاها قاعده مع مشاعر جوه ماتجى تقعد معاكم (اها أوضة مشاعر دى جنب مسرح الجريمه طوالى ) فوزيه طبعا الاسم طقشا ..ركزت شويه لكن مامتخيله غايتو بتكون بطنا وجعتا حبه ….
الحاجه طبعا ماعارفه حاجه ….!! قالت لى عواطف منو ياولد ….؟؟ وانا ذاتى طبعا كأنى ماسمعتا الردحى القبل شويه ده …قلتا ليها عواطف ياخ ..عواطف جارتنا مرت عباس دى …(قلتها كده رميتا رميه وانا ماشى …) بعدين جبتا براحه كده قلتا ليها انا ذاتى ماعرفتها الا كلمتنى مشاعر لقيتا ليك ملفلفه كلها ومنقبه …مشاعر قالت لى مااتنقبت لكن عاملا حنه فى راسا …(لانو مستحيل خبر ذي ده يعدى على فوزيه) (وعامل نفسى بتكلم براحه عشان عواطف ماتسمعنا ..) لكن وحاتكم مركز مع فوزيه اكتر من امى …!! بس وقالت كده مشاعر اقصد ( عواطف ) جات مارقه من الاوضه …والله ياخوانا قدر ما احكى ليكم وقدر ما أقول انتو مابتتخيلو منظر فوزيه ..!! غايتو المره دى مؤكد انجلطت ..!! لانو اول حاجه أصابتا حاله من فقدان الوزن والشهيه والسوائل ..وبقت بس تعاين فى مشاعر كده وماقادره تتكلم ….والعيون لونا بقى بمبى …مشاعر كمان لما تخلص بتخلص وبتقدم عرض …ربعت ليك يدينا كدا… وادتا هزه بى كتفا …طبعا مافى طريقة تتكلم بتنقبض …وامى ذاتا جاتا حاله كده ..!! طبعا هى ماشريك فى الجريمه لكن كمان الكوره فى ملعبا وعليها غرامه …اما فوزيه سبب الاذيه أصبحت لاتقوى على الحركة والكلام (شلل نصفى ) وارتخاء كامل فى العضلات ..وطمام فى الوش …والله لما شفقتا عليها وقالت كده مشاعر فقعتا ضحكه وفكت النقاب …وبقدر مافوزيه فكا منها البنج وصحت من هذا الكابوس ..بقدر مالهجمه خلتا ماعارفه تقول شنو وتتصرف كيف ..!! ..بس وشالت ليك الشبشب واتجهت لى مشاعر.. ومشاعر دى ماقادره تجرى من الضحك خليتم مشتبكين وامى ضحكت ضحكت لما اتخجت …وانا انسحبتا تماما من الملعب….
اها يافوزيه تبتى ولا لِسَّه …..والله فوزيه دى ما اظنها تتوب القطيعة دى ذي الملاريا قاااعده فى دمها …بس شوية أعراس ولا بكيات بتظهر …لكن حقنة الليله دى غايتو بتقضيها سته شهور …والله المره الجايه اجيب ليها عواطف الجد جد ….اها يافوزيه تجى ولا نجى ….

Leave a Reply

Your email address will not be published. Required fields are marked *

error: Content is protected !!