“يوميات علوب” (41) … ياحاجه لا

اليومين الفاتن ديل قافله معاى قفله جد …!! الدولار الطالع ده طلع زيتنا ذاتو …!! بتاع اللبن قال لى الرطل زاد …!! قلتا ليهو ليه فى شنو ..!!؟ قال لى آ زول ها ات قاعد وين (الدورال ) طار السما ….!! قلتا ليو لا ياخى …!! كيف الكلام ده ..!!؟؟ قال لى والله بس أياهو ….!! هو شنو الياهو ..!! كدى اشرح لى ….عرفنا الدولار زاد ..!! انت دخلك شنو فى الموضوع ده ..!!؟ قال لى عاد كيفن ..!! أى شئ زاد …!! اها انا قلتا الزول ده الليله بى زهجتى دى الا أحددا معاهو ….!!! قلتا ليهو بس الليله الا تشرح لى علاقتك ..انت ..وحمارك ..ولبنك ..ده بالدولار….!! ولا مادايرين لبن ذاتو …!!! قال لى ماتزرزرنى آزول ..!! فوق أم كم …!! ماعندك ماتشترى بس …!!! بعدين ات غبيان من الحكومه ماتمشى تسألم ….(أربكنى السؤال ) ..!!! تسأل منو ياعلوووب …تسأل منووو ..!!! تسأل منوو !!!؟ قلتا ليهو أقول ليك حاجه كدى أدينى رطلين هسه….!!! وأنا بى نفسى حأمشى اشوف حكايه الدولار دى …!! غايتو كبا لى اللبن ….قلتا ليهو اها ياحاج نحاسبك بالجنيه ولا بالدولار …!!!؟ أخد ليهو ضحكه كدا لمن انتكى …!! قال لى والله كان عندك ما بناباهو ….!!! علا النطمنك هو ذاتو فى عضمو دى مافى …!! والله السر ود الشيخ أخوى ماشين مصر للعلاج..!! سما أرض مالقوهو …!!! علا ياعلوب مسعول من الخير ..!! انت الدورال ده شكلو كيفنو …!!!! ( سيد اللبن عرف انو اللبن بزيد مع الدولار ( مدخلات الانتاج ) والدولار انعدم فى السوق …( الطلب يفوق العرض مع الندره ) ) والحاله ماشافو بي عينو دى !!! ) والحل (زيادة السعر لتغطية العجز ) هسه ده سيد لبن ولا وزير مالية….!!!
اليوم ده ماظنيتو بمشى كويس …!!! اها قلتا النمشى نشوف أرزاقنا… كان تابعتا الدولار ده رفع ..ونزل ياهو الرفع ضغطى …!! طوالى دخلتا اللبن جوه …!! ولبست دورتا …!! للتعترنى ركبت الحافله لقيت ليك قصة الدولار دى برضو مدوره جوه …واحد هناك تاكل فى الكورنه بدا المرافعة ….والله الدولار ده بس الا دسوهو ….شان يغلي …!! ويغلونا نحنا ديل …!!! ( عمك يتحدث عن التلاعب فى العرض والطلب ) نطت عمتك كبيره كده قالت والله غلبنا النسوى ..!! انتو يابنات امى الحكومه دى مو مشاكله الأمريكان ديل ..!!! خلاص قروشم دى ذاتا مالازمانا ..!! فى شنو كل يوم نحن الدولار طلع..!! صابون العده طلع ..!! لى شنو المسخره دى ….(الحاجه تدعو لفك الارتباط بالدولار ) اها باقى الجماعه ساكتين ( الأغلبية الصامته ) ..!! وصلنا الكبرى قالو الكبرى مقفول …!! فى شنو ….!!؟؟ قالو طلاب الجامعه عاملين مظاهرات لانو الحكومه دايرا تبيع الجامعه ….!!! واحد قال هسه وزير السياحة ده أتلفت جاى أتلفت جاى ..مالقى غير الجامعة دى يسوح بيها …!! هسه كان سألنا سااااكت .. كم سايح جوك السنة دى ..!! يقول لينا شنو عليكم الله ..!! الغنم يبرطعن فى الطابيه والبجراويه إياها ديك غرقانه فى الرمله …!! داير يحلها بالجامعة الراجل ده مايتكلمو معاهو …!!! نطا واحد من هناك قال هو ذاتو الطلبه ديل غلبتم القرايه …!! الجامعة دى ذاتا (قدمت ) خلى يبيعوها …!! وطلع كيسو اخد ليهو سفه ( تسف التراب انت ) ..(عليك الله ركز مع السفه ….) وانا قاعد بس بتأمل فى القصة دى …!!! وقالو كده رجعو تانى لموضوع (الدولار ) والغريبة زول واحد شايل ليهو دولار واحد مافى ( ولا استثنى نفسى ) والله بس الحافله تحلف تقول لافه فى (تكساس) ….!!! المهم السواق أتضايق من
الوقفه قال ياأخوانا شكلنا كده الليله ماحنقدر نعدى …!! الكبارى دى كلها مقفله ..!! فتنزلو لينا هنا …!!! اهاااا الجماعه الساكتين ديل (الأغلبية الصامته ) كلهم قامو ليك …!! كييف ننزل …!! خلاص أدونا قروشنا …!! السواق قال ليهم ونحنا البدينا حق البنزين ده من بحرى لى هنا منو …!!؟ اعمل ليكم شنو أطير انا ….!! أطير …!!! ماياها دى الحاله شايفنها قدامكم …نرجعكم المطار تانى ولا شنو …(الزول كلامو فيهو حاجه من المنطق) والجماعة مسخنين… !!! دايرين قروشم..!! وبوادر أزمة سياسية على وشك الانفجار …!!! برااحه انا نزلتا من الحافله وقنعتا من قروشى ذاتا ….وقلتا انا ماناقص …
لكن هسه انزل اقبل وين أنا …!!! اها رجعت بى رجلينى من الكبرى لقيت لى زحمه كده ..فى شنو ..!!؟ قالو فى حفله جوه عاينتا بالسور ألقى ليك فنان يكورك وأولاد بنططو …الزنق الزنق …عليكم الله هسه ده كلام ده …هسه فى زنقة اكتر من دى …!! المهم رجعت البيت كدارى …أردد فى سرى …الطياره جات بتحوم …دار تضرب الخرطوم …ضربت حمار كلتوم ..ست اللبن ..وياحاجه لا …. !!! الزنق الزنق …النبق النبق ….البصل البصل ..انطط لما وصلتا البيت …!!! وياحاجه لا …..!

Leave a Reply

Your email address will not be published. Required fields are marked *

error: Content is protected !!