السر ود حلتنا ده مشكلتو كبيره خلاص محتاجه تدخل جراحي الزول ده تعليقاتو علي اي موضوع لاتخرج من اثنين …اما صادمة او خارج النص ….والله تاعبنا تعب ….!!!امبارح القريبة دي قاعدين نحنا مجموعه كده من الشباب والجماعة بتكلمو عن واحده اسمها (فجر السعيد ) قالو كاتبه كويتية قالت لو السودان داير حلايب حقو مصر تضم السودان ليها …اها قمنا نبزناها كده …وقلنا بالله شوف المره المتخلفه الجاهلة دي ..(وتفاهتا..!! ) وكلام ذي ده …اها (السر ) بس يعاين في الناس …..وقال كده عمل مداخله …(شوفو جمال الدخله ..) السر قال ياخوانا( فجر السعيد) هينة ….انتو سمعتو بالبعاتي القالو ظهر في الثوره الحاره السابعة ..!!!!! عليكم الله بس اتفرجو ….البعاتي ان شاء الله الياكلك يالسر …!!! ..( انت قاتل ) وانصرافية عن المواضيع الأساسيه بشكل مؤلم …اها دي كلها مقدمه عشان تاخدو فكره عن الزول ده …..!!! أقوم انا للتعترني سقتو معاي حفلة خطوبة واحد صاحبنا …وهو انا ذاتي بيني وبينكم سقتو (قدر ) كده لأنو الوقت أتأخر بس لقيتو قدامي في الشارع هو عندو موتر (فيسبا ) كده ليهو مية سنة… …بس قلتا ليهو سايقك حفله ….!!! طوالي اسمع ليك الموتر وررررر ورررر ….دور اها ركبنا …ومافي طريقة أقول ليهو ماتدخل ….!!! (بس بي فوق فوق كده حذرتو يتفادي اي دخول في نقاشات …). والله اريتني كما سقتو اول حاجه الحفله مافاهم فيها اي حاجه أراقب فيهو ذي (رجل الخط ) بس اللحظة الغفلتا منو دقيقه …أعاين ألقي ليك( السر ) غاتس وسط مجموعه من المعزومين طوالي جريت عليهم ..،،(في محلوله لابطال مفعول القنبلة ….) ويدي في قلبي ..لَقِيتُم بحكو عن عن الناس البنشرو صور الناس في الواتس وينتهكو خصوصياتم وكلام ذي ده ..(والسر ينصت باهتمام )…..وانا اشيل واغمز ليهو بي عيوني واعضعض في خشمي …(المعني ولا كلمه) ..!!! ….فعلا سكت ساااكت بس جاتو الحاله …..ونطق ..(المره دي في صلب الموضوع ) لكن اسمعو قال ليهم شنو ….(الأسد النتر …)
قال والله انا بي يدي دي ناشر لي صور عشره بنات برقصن …!!! هن ذاااتن الوداهن يتراقصن شنو ….!!! والله نرجمن لمن يفهمن حاجه …..!! اتلفتا لقيت زول فضل جنبو مافي …!!!وبتين عقبن ….يغسي …!! يغسي عليك ….هسه يعني خلاص كده بقيت راجل ….!! وانا بس داير انشقا من المغسه …جيت قلتا ليهو امرق قدامي ارح ….!!!وبي صوت عالي رد علي ….ايوه أحسن نمشي ذاتو بت واحده سمحه مافي …حفله ضاربه …( يضربك ملك الموت انت ) …والناس كلها تسمع …!!! (يافضيحتك ياعلوب جايب معاك معتوه ،،،،) ونحن مارقين كده لقينا مره كده داخله وهي كبيره شويه لكن تعبانه في روحا (ومتسوغره ) كده ..طوالي السر لفحا ليك بي تعليق …هسه الوليه دي كان شافت ليها حجه ولاعمره ماكان أحسن ليها …!!! انا هنا اتشليت …!!
هي لكن هي ذاتا بتلعب …!!!سمعت التعليق…. وقالت كده جاتو ….واستلمتو ….تعال هنا يالديك الذعوري …(امممممك ) أمانة في ذمتك هسه وشك الذي( السرويس ) ده وخشمك الذي (الدرج )ده …كمان بتتفاصح …انت مالك ومال حجتي وعمرتي …!! ياتمامة العدد …شوف الخلقه والاضنين …(انا غايتو حالة الفرح التي غمرتني قل ان تتكرر) وبي قلبي أقول ليها ايوه أدي …!!اردميهو ردمو البلا …وهو بس يعاين ومتفاجيء (ماغلطان كمان …) …وهي دايسه بنزين …اخدت ليهاسكته خفيفه ..ورصعتو …غايتو الراجل وقتين يكون عاطل وماعندو شغله اياهو بس شغل ( المشاطات ) ده (اركز يالسر ) …والله ولا قال كلمة…. مرق ذي الحرامي …!!! ركبنا الموتر ..انت داير أقع من الضحك ……وهو ….وررر… دور
قال لي دي مره جاهله ساكت انا مابرد عليها …قلتا ليهو والله يالسر انت غلطان بصراحه ….وحقو ده يكون ليك درس تاني ماتعلق علي الناس …!!! قال لي خلينا من الوليه الفارغة دي …انت صحي (مها ) بت جيرانا دي طلقوها ….!!!!!!! مافي فايده ..السر لازم (يتفرمت ) ……!!!