غايتو ياعلوب الشافك قعدتا فى نص لندن دى ماكضب …..ان شاء الله تبيع مساويك …ده كلام شنو ده ياخوانا
هل بتصدقو لاقتنى واحده ومن غير اى سبب …!! لا شاغلتها …!! لا عاينتا ليها شديد …!! ولا اى حاجه ….!! عين كده خفيييفه ….(ذي الشرعيه ديك ..!! ) بس هى ذاتا أدتنى نظره كده ….!!وبدون مقدمات قالت لى (يو أر سوووو نايس …يور هير اند يور فيس واز اميييييزنغ ….زس إز زى كولور أوف فورست …لوفلى ) اقسم بالله قعدتا أتلفت ذي الحرامى …!! البت دى أكيد ماقاصدانى انا…!!! ولا مجنونه …!!! واحد فى الاتنين …!! هل بتصدقو انو فعلا الحاجه دى حصلت …!! انا علوب الوااحد ده طلعت بالمواصفات دى …..!! (بسس دى ياها ذاتا البت البتستاهلنى وبستاهلا….!! وقدرتنى وعرفت مقامى ….) …انت ياعلوب طلع لونك لون الغابات الساحرة …..!!! ؟؟ (شوفو الوصف ده …) ووشك مدهش ومعبر …!!! وشعرك المقرمد ده طلع ساحر …!! على الحرام شهادة تتبروز من خواجيه ذيها زي اى زرافه لافه….!!! طول فى عرض …!! وش ذي الشمس …!! عيون غريبه ….!!! غازا ليها مسمار اتنين بوصه جنب الحاجب …!! كميه من طرح الثقة تسقط رئيس وزرا ….!!! (نص ) اصلو فى حياتى ماشفتا ذيو …!!! سال من شعرها الذهب دى اول مره اعرف ابو امنه حامد قاصد بيها منو …!! بس ياها دى البت دى ….!! اها لسانى اتعقد ….!! والتمتمه ظهرت …!! قلتا ليها انت معاى انا …..!!؟ قلتها كده بالعربى …!! تانى اتذكرتا انو انا مافى حديقة القرشى …قلتا ليها …(بالإنجليزي طبعا ) (انجليزى برزنت كونتينيوس تنس ) انت قاصدانى انا …لم تتردد (دى الثقة الفاقدنها فى بناتنا )…. (أوف كووورس ….) وباللهجة الانجليزية ديك البياكلو فيها الكلام ..(هو نحن الانجليزى حق أستاذ على جعفر مافهمنا ) المهم يازول انا مركز وكل حواسى مع البت دى …قلتا ليها والله شكرًا ده من ذوقك (بالانجليزى ده كلو وما تسألونى كيف…!! المهم بيوصل …) قالت لى لا دى حقيقة …!! انت مدهش وغريب..وأنها أعجبت بهذه الشخصيه ….(والله الواحد بس حقو طوالى يشترى ليهو خروف يضبحو يخلى الخواجيه دى تتعداهو …) ياخ انا مما الله خلقنى مافى زول رفع معنوياتى ذي البت دى ….!! صفاء بت جيرانا كل ماتلاقينى تشبكنى ليك انتا الليله اضنينك ديل مالن ياعلوب …!!! اضنينك بالقطع ياصفاء….!!! تعالى شوفى الناس البتفهم ….. قلتا انتا كمان ياعلوب حتقعد كده ذي التجم …وماترد التحيه دى …..!! قلتا ليها انا سعيد لانو الكلام ده جا من واحده زيك تشبه القمر …(لايك زا مون …) انا قلتها عشان ساهله بالانجليزى…!! وهى طارت بيها السما …(اووه ماى قود) …قالت لى انت ساحر …!! يازول طوالى عزمتها كوفى …!! اها الخواجات ديل ماعندهم قصة عرفة من متين …!! وتعزمنى لى شنو ..!! وقصدك شنو ..!! واخوي بشوفنى ….!! طوالى قالت لى (قريتلى اونرد زس انفتيشن )
Greatly honored this invitation
أقول ليك قوله…. والله انا السعيد ومتشرف …). يازول القهوة كمان بتلفتو ليها …!! الشارع ده كلو قهاوي ..وزول بعاين للتانى مافى …غايتو انا كان فى شى بقعدنى فى البلد دى ….!! بس ياهو قصة زول بعاين للتانى مافى دى …!!! ياخ دى والله تساوى الدنيا كلها …!!! اتخيل ناس جعفر صاحبى يكونو ماجونا فى البيت ….!! وعارفاننا اتغدينا بى شنو !!! …معقوله ياخ …!!! المهم يازول قعدت ليك معاها راس بى راس …قلتا ليها تشربى شنو …قالت لى ..(لاتييه ) ..(ياربى ده شراب ولا بنزين) قالت لى وانت ….قلتا ليها برضو (لاتييه ) ( يعنى حاطلب شاى مقنن ) ….المهم صدقو هى البدت الكلام ….قالت لى انت من وين..!!؟؟؟ ..قربتا اقطع ليها مسدار وأقول ليها…!! انا من بلد الكرم والجود والرجاله الفايتا ليها حدود …هيا علوب لم مسارك ده عليك ..انت فى لندن …!!! والله اقولو طوالى يفتحو لى بلاغ ارهاب ….!!! قلتا ليها…( ايام فروم سودان ) ….بتعرفى السودان ..!! اوووه سودان افريكا رايت …!!! قلتا ليها بسس وصلتى …هى ذاتا ماركزت كتير…!! هي مالا ومال من وين ….!!! مافى جهويه هنا ….!!! المهم انا علوب العجبتها ….!!! خجلتا أقول ليها انت من وين …!! (حتكون من شمبات يعنى ..!!! ) قلتا ليها انت اسمك منو ….قالت لي إليزابيث (ذي كول مى ….ليزا …) عاشت الاسامى ياليزا اللذيذة ….المهم قعدت تسألني انو انا هنا بعمل شنو
قلتا ليها نحن جمعية الرفق بالحيوان وجينا زياره لى لندن نشوف حيواناتكم ….البت دى قامت من محلها ده وجات على …..أدتنى حضنه فى راسى ده خلتو لافي …داير أغمر ….ولا غمرتا ماعارف ….اللييييله ..!! اتخلعتا خلعه …وقَعَدت اتلفت …!! قسما بالله زول ساكت رفع عينو دى عاين لينا مافى ….غايتو دى لو فى السودان كان لقيت لى كتيبة من النظام العام ومحرر الدار فى وشى ..وبالليل معلق فى حيط الفيس والواتس ….!!! الله ده بس شافنى من فوق ….!! الليله ياخوانا ده كلام شنو ده …المهم طبعا غلبنى الكلام …!! واتبكمتا ذي العوير ..!! وهى تشيل وتقول لى ( يو أر سو كايند …بى سايد زى انيمالز ) …ياحليلك ياعلوب يالطلعتا انسانى وعطوف حتى على الحيوانات …وانا قبل ما اجى لندن دى بي يوم ساكى لى (كديسه ) شربت اللبن فى البيت …مرقا منى الله ..
غايتو ليزا فضل ليها تبكى …!! وقالت لى انا احساسى اصلو مابخيب من شفتك حسّيت انك مختلف ……
وانا غايتو بس فى حلمه …!! المهم يازول بعد ماحضنو راسى داك ….استغفرتا …وشلتا نفسى …قلتا ليها بالجد ياليزا انت انسانه …!! ونبيله …!! وكم كلام كده حلو كنتا حافظو من رواية انجليزية اسمها Tale of Two Cities
كنا ممتحنين فيها قمنا حفظنا الكتاب كلو …!!! المهم كمان ليزا سمعت الكلام ده قايلانى شكسبير …..والله عيونا ديل غرودن …!! كمان غرويدة الخواجات صعبه خلاص …!! اول حاجه صاااادقه مع العيون الخدر ديل والله تقطع القلب …وانا بس كأنى فى MBC 4 …!! غايتو منظر عجيب ….المهم يازول أخدنا قعدتنا ديك انا وليزا ….امكن ساعه …وطوالى فجاة قامت على طولا…. (وحلات الزول فى الطول والعلا ….) قالت لى انا مواعيد شغلى جات …!! شغاله وين انت يالشقيه …!!! قالت شغاله فى المتحف …!! مرشده سياحية …(البت دى كمان ماتكون قايلانى اثار …) المهم ودعتني وقالت لي (تيك كير الوووب ) ( والله حلات (الوب ) فى خشمك ) …بختك ياعلوب اسمك دخل قوقل …المهم والله حزنتا انها ماشه …!! نحن كمان الحنان ده يخلو لينا..!! والله كأنها عشره …وليزا ذاتا أدتنى عين وهى ماشه ..!! تكفينى باقى الصيف ده …المهم قالت لى خلاص نتواصل ونشوف نتلاقى وين …قلتا ليها بجيكم فى المتحف ….قالت لى هناك لو جيت حتكون (الووب ) الزائر للمتحف يعنى مافى اى ونسه …والله اتذكرتا (فدوى ) فردتنا فى الجامعه شغاله فى وزارة الزراعه فى التحصيل …!! يوم زرتها فى المكتب طوالى قفلت الشباك فى وش المراجعين قالت ليهم عندنا اجتماع ..!! تعالو بكره …!! (هو لندن دى بقت كده من فراغ …) ياحليلك ياليزا ماشه …المهم قالدتها …!! ومضت الى حال سبيلها …خلتنى بين يدى الله ….هسه انا اتصرف كيف ياخوانا باقى لى تلاته يوم واجى راجع السودان ….اها اشوف نهايتا ولا اجى صاد …اها قبل ما أتحرك من القهوة جاتنى رساله فى التلفون
Nice to meet you aloob I miss you soooo much ..Liza
الحى الله والكاتل الله ….صحى الحب لادين له ……تجى ولا نجى ……