الليله بس شوفو لي طريقه ….لا لا لا دي مابقدر افوتا ….!! رمضان ملحوق ..!! فضلو فيهو كم وعشرين يوم لكن الطياره دي بتجي متين تاني …!!؟يشهد الله مش كان لبستي عبايه كان لبستي شنو داك الليله نورتينا وكتحتينا وجهجهتي صيامنا ….!!! دي واحده ساكنا قريب مننا كده ناس بيتم ذاتم بتفرجو فيها …..!! من بنات الشهادة العربية ديل وارد المملكة جايه من (الهفوف ) (وانا أقول مالو قلبي هفا كدا ) ..!!! البت دي جابوها تقرا الجامعة هنا مع ناس خالتا ( شوف نحن كمان شهادة البحث جبناها …..!!(خالتا ذاتا مابتكون عارفاها من (الهفوف ) …!!
الشاهد إنّو هذه البت موقفه الحلة دي بين يدي الله ،،،الجماعة سامنها ( عاصفة الحزم ) لانها جايه من السعوديه وكونها بتظهر مره كده كل شهر ولا شهرين …!! تكتح الناس دي وتبقي مارقه …!! ياخ مره عندهم عرس في صالة الغروب (اليوم داك أشرقت طبعا ) بتصدقو لقيت اولاد الحلة ديل كلهم بالصف دونما استثناء مشاركين..!! وزول كلم التاني مافي …!! لاقاني جعفر قدام الباب قال لي (عاصفة ) برضو..!! قلتا ليه ايوه ..!!! وفقعناها ضحكة ودخلنا …!!!
اها دي ياها البت دي …!! ومن نفحات الشهر الكريم مرقتا العصر اجيب لي حاجات من الدكان بس القي ليك العاصفة شخصيا (هابا ) هناك …!!! ملفلفه كلها بالعبايه لزوم
رمضان …!! (العبايه يخلوها ليها …) والعيون التي في طرفها حور …!!! قالت لي عمك (يس ) بتاع الدكان عندك (كورنفليكس ) …(يكون قايلو اسم دوا) …!! زولك داير يقع من طولو …شايفو نطط عيونو ..!! لاعرفتو منها …!!ولا من الطلب ..!! لكن حكمة الله بتاعين الدكاكين ديل بعرفو اي حاجه..!! كان غلبم الاسم الصُّوره البره مابتغلبم (ربنا ده مابضيع زول ) المهم اصلو ماقال مافي ..!!دخل يعافر في بضاعتو دي يمين شمال وانا بس اها ..!!عيني دي مانزلت منها …نسيت اسمي ذاتو ..!! خلي رمضان ..!! وهي ذاتا حست بي قعدت تتلفت ( حمامه بس …) ..!!! وحمدت ربنا جاها تلفون يمرقا من جنس الحاله دي …!!! ايوه ياخالتو …أهو عمو بتاع الدكان بشوف لي فيهو …!! الليله غايتو يا (يس ) تضبح بس …!! مبروك الترقية من عمك لي عمو …!!! وانا مندمج مع الصوت …!!!لا لا مابقدر اشيلا براي ياخالتو انتي عارفه يعني شنو (كولا ) (فاميلي سايز …) …!!! (مسكينة ماشافت (كدوس ) ودجيرانا بشربا شراب ( الفاميلي سايز ) دي خلي يشيلا …..!! اقسم بالله انا طوالي قلتا بعد تنتهي أقول ليها افوووو انا قاعد اعمل شنو والله الليله لوري (كولا ) اشيلو….!!! اها قفلت الخط وقالت لي عمك مافي ولا شنو ….!!؟؟ وزولك اتجهجه وقعد ينبز في الجماعة كيييف ماجابو ليهو الطلبية بتاعة (الكورنفليكس) وانا متأكد إنّو اصلو ماطلبا…!!! (كورنفليكس ) لي منو يا يس ..!!؟ كدوس مثلا ) ..!!( الدنيا رمضان ياخ ) ..!! وهي قالت كده أدت ليك الطرحه دي لويه …( لوتني في مصاريني ) واستعدلت للانطلاق …!! قالت ليهو مامشكله بشوف مكان تاني …!!! طوالي انا قلتا ليها اها والكولا ….!!! قالت لي نعم ..!!؟؟ اتذكرتا انها كانت بتتكلم مع خالتا ….!!! قلتا ليها لا انا مع سيد الدكان ….!! قالت لي اهااا انا أسفه …،،ومشت خلت خشمي ده ملح ملح مع العطش الفيهو …عمك يس جاب لي الصلصة
الطلبتها مداها لي داير يفلقني بيها …!! قلتا لي مادايرا …!!؟ اقعد تابع لي في الصلص ..!! وماجي ..!! ومربة سعيد …!! هسه لوجبتا (الكورنفليكس ) ده ماكان عبرتا !!!؟ صحي غايتو مرمي الله مابترفع … ..!! عمك (يس ) هين ….!!!! انا البرفع صيامي ده شنو الليله ……تكون ياربي العاصفة دي شالتو …!! غايتو النمشي نشوف لينا (كورنفليكس) نتسحر بي …!!والسويتيها رقدت يا ام عيون سوات العاصفة بي ساق الشتيلة الني …!!! الله كريم علينا …!!!