قالو الليله ماشين حفلة اخونا عباس بمناسبة نيله درجة الدكتوراه ….والله خبر لكن …!! بس ياجعفر انت مش ياهو ده عباس السجمان الكان معانا فى الجامعة داك ولا واحد تانى …!! قال لى بسس ياهو ذاتو …قلتا ليهو… عبااااس …😳! هو تالته بس قعد فيها سنتين …!! …المهم اتكركرنا مشينا الحفلة …!!! وصلتا متأخرين شويه بس دخلتنا كده نلقي ليك عباس ده شايلنو فوق ذي الكاس اليدين ديل فى السما ويشيل
يوزع فى الباصات …..!! وفنانه كده فى المسرح شغاله (جبجبه ) من أمها ….!! قالو اسمها (قمريه ) …!! والله صحى قمريه….!! عايزه تطير بس…!!
والصالة مليانه فل ….!! والدكتور يسكسك ….!!! ياربى جينا غلط …!! أبدا والله ياهو داك عباس ذااااتو البتهوزز ده ….!!! المهم دخلنا شافنا ليك من بعيد …قال للجماعه نزلونى …وجا علينا هياااا (ركس )…!! سورى (يادكتور ) شنو المفاجآت دى انت بتقرا من ورآنا ولا شنو …!!! قعد يضحك قال اهو حاجه بسيطه كده …(بسيطة شنو انت عازمنا عشا …!!!) لا قال ولسه المفاجآت فى الطريق …(اوعى يكون بس فى رسالة تانى شغالين عليها …!! ) المهم قلنا مانفسد عليهو الليله والأجواء ….!!! بس ( دكتور ) عباس دى ماقادرين نبلعا….. !! بعد شويه واحد كده مسك ليك المايك قال والآن نادى النسر الرياضى يكرم قطب النادى الكبير الدكتور عباس ( بقيت قطب.!!!؟؟؟ 👀) وذلك بمناسبة نيله درجة الدكتوراه ونقدّم له شعار النادى من الذهب الخالص ..!!!! هيااا اهلنا هو وينو النادى ذاتو ..!! خلى الدهب ..!!! وعباس داخل فى الشخصيه يلبسو ليك فى الشعار والموبايلات تصور …ويتبسم ….!! ونحن الشمار كاتلنا قلتا لى واحد كده جنبي …انت عباس ده جاب الدكتوراه دى فى شنو ..!!! وهو ذاتو كان وين الزمن ده كلو …قال لينا كان فى روسيا …ايواااا ..!! اها وجاب الدكتوراه دى معاهو …!! ولا شحنا ….!! قال والله ماعارف …!! بعد شويه قال عن اذنكم الاغنيه دى حاره شديد مابقدر افوتا …!! (واندغم ) وسط الجمهور …!! (حضور ذاتو متميز …مجموعة من العلما والباحثين )… اها لقينا ليك الزول القدم الوشاح قبل شويه ده ….!! قلنا ليهو مبروك والله عباس اضافة كبيره لفريق النسر ..!!! قال انتو بتعرفو فريق النسر ..!!؟؟ ( هو ذاتو مامصدق …!!! ) جعفر قال لى كيييف ..!!! النسر ياخ …!!! النسر ..!!! ياسلاااام .!!!!! فريق خطر ….!!!! انتو بتلعبو وين ..!!؟ قرصتا جعفر بى تحت قلتا ليهو شنو خطر ..ورهيب وانت ماعارفو ذاتو بلعب وين ….!! سكت !!!!
المهم الراجل قال عندهم فكره يعملو عباس رئيس للنادى بعد الدكتوراه دى …!! قلتا لي هى الرسالة بتاعتو فى المجال الرياضى ولا شنو ..!!؟ قال لي لا هو عامل دكتوراه فى اثر الموسيقى الكلاسيكية فى الحقبة الرومانية (امممممك ) والله موضوع الساعه …!!! (ان شاءالله ياعباس بس تكون لقيت الأثر ….!!) … وأنتو فى النادى عندكم (باليه ) ولا شنو ..!!؟؟ طوالى قال لينا انشاء الله اتعشيتو …!!!؟؟ جعفر عاين لي كداااا (وخلا وجهه من التعبيرات) …!! طوالى سقتو ليك ودخلنا ليك فى نص الدايره …قلنا (نجبجب ) مع عباس ده شويه لانه خلاص أصلا هى باظت …!! جب…!! جب…!! جب ..ايوه كدا ياعبس من يومك شقى …!! اتارى (الربات ) البتعملا لينا ايام الجامعة ديك
كلها كانت بحوث ونحن ماجايبين خبر ..!! كبير ياعباس … !! والله غبتا وجبتا يادكتور …!! ونشيل ونصفق معاهو …وجعفر يكورك الزنق الزنق الزنق ….!! وانا أعقب ….الكتم الكتم الكتم …!! فعلا ياركس رسالتك اضافة حقيقيه للبلد يعنى هسه ياعبس لو شغلتا لينا موسيقي كلاسيكية وقت المغربيه ماكان الناس دى هدأت كده وراقت من جرى البكيات والمستشفيات ده …!! غايتو ياجعفر بكره من الصباح على السفارة الروسيه نسألم كان عندهم دكتوراه فى نومة العصرية وتأثيرها على سواقة العربية…!! ( ان شاءالله فخرية) …!! نفسى أبقى دكتور ياخ ….!! ياربى (قمريه ) ما مفكرا …!!!؟؟ 💃….كتمت …!!