“يوميات علوب” (55) … عالهوا مباشر

جيت داخل لقيت المنتخب ده كلو في البيت …!! نسوان حلتنا كلهن بالصف عاملات (هوانم غاردن سيتي ) في جلسه رمضانية مامنظور مثيلا …!! جايات يفطرن مع الحاجه وكل واحده جايبه معاها أكلا …اها منظرن قبل الفطور يُحنن …صانااات …!! وساكتات ساااكت …. وصلاة تقيله …
لكن قبل ماندخل علي الفطور ..!! خلوني أعرفكم عليهن ….
نمره واحد (سكينه ) بلقبوها تحت تحت بي (رويال كير ) …!! السنه كلها تشكي ….!! أحسن زول بمثل إنّو عيان في العالم …!! واصلو مابتلاوز… الأعراض البتقولا دي مفروض تدقا ليها خروج قبل كم سنه …!! لكن يبدو انها تعشق التعاطف والمواساة …!!!
قلب الدفاع (ملكه) (اسمها كده) ….النصيحه هي ( ملكه ) …!!! أسمح مره في الحله ..!!!!! لما النسوان بغيرن
منها …!! بس خساره الحلو مابكمل ..!!! مابتعرف تتكلم…!! ولديها من التعليقات مايسبب… الجلطة ..!!! (امكن ده الشي الوحيد الكافي عنها العين ) …!!
….ثالثة الأثافي ….الرضيه وفوزيه في الأجنحة…!! نسوان ذي النسوان …!! مقدرات ومتمرسات ….!! والكلام ده برصنو رص …!! والعقل المدبر في الحله …!! هن البحددن السياسات العامة والخطط الاستراتيجيه… !! لذلك تسعي كل النسوان لخطب ودهن ….!! لو قصدوك …!! بفجروك عادي …!!! وتتفوق فوزية بأنها (وزير المالية ) اي صندوق وخته في الحله دي لا يمر دون توقيعها …!!!
ربيعة ..!! وما ادراك ماربيعة ….!! وزير الأوقاف ….مشت الحج تلاته مرات …!! كل الفتاوي عندها …!! اسمها كرسمها …!! مره متدينة كده ووقوره وجنها مواعظ …!!ومثلها (محاسن) لكن الاخيرة وسطيه لو لقت طريقه بتشارك في (القطيعة ) بس بتستغفر بي سرعة …!!! نجي لي (سنيه ) وزير الاعلام والناطق الرسمي في الحله دي …اي خبر عندها …!!! خطوبة ….!! طلاق …!! خلافات عائليه …!! ميراث …!!! كلو.. كلو ..!! ويبقي الخبر معلقا حتي تقوم هي بالنفي أو التأكيد …
اووووو (عواطف ) اها دي (MBC ) بتاعتن ماعندها شغله غير التياب والحنه ….!!
اها الليله لَقِيتُن كلهن في البيت ( بركاتك يارمضان ) … قبل الاذان ماسامع منهن اي نفس ……!!! طلعت بي الصينيه فطرت مع الجماعه في الشارع وجيت …!!! بس ألقي ليك المباراة دي مدوره …!! يازوول أتفشن الصيام ده كلو …الا (سكينة ) راقده ممدده …!! قالت خلاص قام عليها الهبوط ..!!وقالت كدي كتلت عيونا …!! لم يخرجها من الحاله الا تصريح من سنيه إنّو إيمان بت جيرانا حيعرسوها في العيد …!! بالله سكينة التقول ادوها درب طوالي نطت ….!! واصبري ياسنيه بت أمي العريس من وين ( ماقلتي هابطة ) …!! اها (ملكه ) حبت تشارك …!! وليتها لم تفعل) …!! قالت …والله الا تكون دي ليلة القدر اصلي ماقايله إيمان بي شناتا دي بعرسوها …!! ونست (كالعاده ) ان فوزيه لها علاقة قربي ومن الدرجة الأولي بذوي العروس ..!! فسادت حاله من الصمت يشوبها الحذر …أعقبتها ملكه بتصريح مضاد بعد ماشافت العيون نططن …!! (لكن والله عاد هي النصيحه بت ظريفة وطيبه شديد)..(مااابحلك ) ،،،(لم يشفع التعقيب في رأب الصدع ..) واستني الراجيك ….فوزيه لم تعقب …!! لكن لامحالة فان عقوبات دوليه ستطال (ملكه) … ..!! وامي الله يديهاالعافيه (ماعشان أمي ) لكن هي دايما رمانة الميزان …!!! (طبعها كده ) ..!!لذلك فهي تحتفظ بهذه المسافات المتساويه مع الجميع وبالتالي فهي المؤهلة فنيا لاستضافة هكذا لقاء وحدث …!! حبت تلطف الأجواء …والله ملكه دي غايتو يابنات أمي جنها هزار ..هسي منجضه( مشاعر) بتي دي نجاض ..!! (في أشاره الي عفويتها) …وتقليلا للخسائر !! ( ضحت بي مشاعر ) …!!! هنا فقط وجدتها الرضيه فرصه لطرح السياسات المالية القادمة واعلنت عن صندوق العيد وسط مباركة الجميع وخلاف بسيط حول إجراءات الصرف ومن له الاولوية …!!! (سكينة ) تاني رجعت للحاله..!! واتكرفست وأدت العيون وقعه…!! المره دي معاها (قحة) وخمة نفس ..!! تكون دايرا الصرفه الاولي …!! ) زوووول اشتغل بيها مافي …!!! وفوزيه لاتفوت مثل هذه الفرص
قالت للرضيه و(رويال كير ) دي ياختي ده شنو التوب اللابسا ده قال (رويال كير ) قال والله دي ( حوادث بحري ) ..!! ثم همست لي الرضيه إنّو (ملكه ) مستبعدة من الصندوق ( وبدأت العقوبات الاقتصادية ) ..!!! ماقلتا ليكم مقدرات ..!!
اها بعد شويه النسوان ديل وبعد ان ذهب الظمأ وابتلت العروق زادن السرعة …!! ودورت الماكينات الألمانية ….!! هنا فقط فقدت القدره علي التعليق والمتابعة ….!! اقسم بالله فلم كرتون بس …!!كلهن بتكلمن في وقت واحد…!!! وحكمة الله كلهن سامعات بعض وفاهمات اي كلمه …!!وبجدعوا في الباصات دي ذي الباسطه …!! وجنس ضحك وقرقرابه …!!! في شنو ماعرفتو..!!! ومشاعر جابت القهوه يازول والمباراة سخنت والبخور في السما…!! عواطف ) (mbc ) قالت بي (دستوووركم ) ربيعة حدرت ليها( بلعتا ) …!! وتم طرح خمستاشر موضوع …!! وأسماء تم تداولها لم استطع حصرها (تقول لي اسماء في حياتنا ياعمر الجزلي ) ومرات كده لقاءات جانبيه ومشاورات بين الرضيه وفوزيه …..!!
(وملكه ) تضحك بعد مالناس تسكت …!! وعندها عباره لي هسه ماعرفتا قاصدا بيها شنو بعد كل جمله بتقيف مساافه وتقول …..وكدا …!!! قربتا أسالا أقول ليها انتي ….وكدا دي يعني شنو …!!؟؟
ولم ينهي هذا اللقاء الا ربيعة التي إشارت الي مواعيد التراويح …(فقطعت جهيزه قول كل خطيب ) …!!! وبدات مشاعر في فرز الحلل والصواني لتسليمها لذويها وإلا ستحدث أزمة اكبر من أزمة ( ملكه ) …!!
بارك الله فيك ياربيعه انا ذاتي كان تابعتكن كان نسيت التراويح …!! غايتو الحمد لله الليله مباراتين في يوم واحد …كاس الامم الأوروبيه …وكاس ملكه وفوزيه …!!! وانفض السامر ..واللمه تحلي في رمضان ……وكدا

Leave a Reply

Your email address will not be published. Required fields are marked *

error: Content is protected !!