“يوميات علوب” (56) … عزومة مشاعر

الليله الدوري الانجليزى ..!!! مشاعر عازما صاحباتا الفطور …!!! يازووول عبايتى وعبايتك ..!! طرحتى وطرحتك ..!! جيت داخل قلتا (داعش ) دقشت الحله ….!! …وهن مما شافونى قعدن يضايرن ..!! سلمتا على صفاء ابت تمد لى يدها …!! قالت متوضيه …!! دى ياها ذاتا (صفا ) البتقول لى انت رقبتك دى مالا الليله معووجه كده ياعلوب …!!!
ناس تقوي وإمنيات ( حربيات شديد ) من العصر مع مشاعر يجهزن ويرتبن….!!! ياحليلن …!!! اها قروب ناس اميرة … (بتاعة اللوترى ديل بتتذكروها) .. (اللاويه خشما أربعة وعشرين ساعه دى ) ومعاها (مودة ) ( سوط العنج ) الكانت دايرا تخطبا لى مشاعر ….!!! اها ديل جن داخلات قبل الاذان بشويه كده …!! نفس الحركه البعملوها فى
الحفلات ..!!
انا المستغرب ليهو صفاء دى .. ..!!! بشوفا فى البيت اكتر من أمى…!!! بتجينا ناطا بى سبب ومن غير سبب ….!!! الليله يومنا الدايرنها عملت مجنونه ….!! جات متقاوده مع (الاوادم) ديل …!! تانى النشوفك حايمه هنا الساعه اتنين…!!
اها مشاعر تعجبكم طبعا …الليله يوما ….!!! داخله ومارقه..!! ومركبه الشخصيه ومادين القدوم …!! ملفلفه ليها بمية توب ….!! مرقت العده كلها الشرونى ليها …!! والليله اول يوم اشوف (البتيخه ) دى مقطعه فى شكل ورده ..!!!كان بطعنوها …!!!!!
المهم انا شلتا صينيتى وفطرتا مع الجماعة فى الشارع …!! جيت داخل المطبخ ارجع الحاجات ..!!! ألقي ليك صنيتن دى تشكى وتبكى …عضه ذي العضه…!! البشوف الصنيه مايشوف الاستايل …!!! المهم قامن على الصلاة بالصف ماشاء الله …(انشاءالله الشيطان ده يمدو لى التصفيد)
وكما حدث مع سكينه (رويال كير ) يحدث الان …!!! صاحبتن تغريد (اتجنضلت ) رقدت ..!! وهن ملمومات فيها قالت حاسه بى دوشه كده ..( بكون من العضه ياتوتا ) …!! صفاء طبعا (جنت ) ..!! متأثره بالمسلسلات شديد …!! قالت ياخوانى اضربو الإسعاف …!! هى الكهربا جات قبل شويه…!! إسعاااف …..!! 😳 …المهم بعد شويه (تغريد ) ذااتا رفعت راسا …!! قالت لى مشاعر عليك الله جيبى لينا ( MBC ) نشوف برنامج (الصدمة )…!! فظيييع شديد …!! (والله انت الفظيعة) ..!! (الصدمة فى قومتك دى ….) ….!! نطت ( ضحى ) صاحبتم قالت غايتو البرامج كلها ضاربه السنه دى لكن ووووب من هانى عابدين …!!! (هانى ده منو ) ..!!؟؟ (طلع فنان فى اغانى واغانى)….( تقوي ) قالت ليها مهاب وبس …!!! (حتى أنت ياتقوى ) …!! اها ناس (مودة ) عاملات فيها مابحضرو القنوات المحلية دى قالت متابعه مسلسل اسمو (الاسطوره ) فى ام بى سى ….!! ورامز بلعب بالنار …!! (رامز بالرا )…!!( سمح ياليلى علوي….!!! ) أميرة طبعا (وعويج الخشم ) قالت ياخوانى (تيّم ) بجى الساعه كم …!! أنا قايلو قريبم …!! طلع ممثل سورى كدا …!!! وعندو رابطة مشجعين …!! (صحابى واحد ماجات سيرتو ) …!!! اها وبعد ان ذهب الظمأ وابتلت ( الأصابع ) الموبايلات طلعت ….وقالن كده دورن !!! شى بى يد واحده…..!! وشى باليدين الاتنين…!! (ديل ناس القروبات) …..!!! طباعه جد ..!!! ومشاعر ماخلت ليها (سيرمس ) مامرقتو …!! رصتن أربعه …!! (القهوة والشاى عرفناهم … الاتنين التانيات ديل شنو ياشوشو ..!!؟ تمومه جرتق ) ..اها والونسة كلها عرفتى …!! عرفتا…!! عرفتى …. !! عرفتا ….!! انتو (عرفتى ) دى شنو …!!؟؟
طبعا الليله ماعندى طريقه ادخل وامرق ذي لمة الحاجه ….!! شلتا قهوتى وبقيت مارق …!! بس اقلب ليك فى (الفيس) كده قدام الباب ….!! اشوف ليك الحفله دى كلها منقوله على الهوا ..!! فتحتا صفحة ( مشاعر) ألقى ليك الصوره دى قدر القيامه وبالخط العريض ..(صحباتي حبيباتى واللمه فى رمضان )…!!! ( عبايه واحده مافى ) والأربعة سرامس مرصوصات …!! والصور دى نازله تتطاقش …!!! بارك الله فيك يا ( مارك ) بيتنا مباشر ..!!)
هيااااا يااخوانا شوف ( مودة ) كمان مادين البوز فى السيلفى ….!!! (مابحتاج يا (عصعص ) ممدود طبيعى)..!! وده شنو كمان..!! …هيااا ياجماعة …!! فطوم اختى الصغيرة …!! انا قايلا نامت…!!! القاها ليك مقزوزه فى نص الصور ….!! وبالاحمر شفايف…!! ( الليله بكتلك )…!!!
اها جن مارقات مقدمات ( أميرة ) … (أهميات شديده) …!! قالت عندها موعد مع الدكتور …!! تكون شارده من التراويح …!! قالت لى مشاعر انشاءالله بس البسبوسه بالكريمة تكون عجبتكم ( اهم شى الكريمه ) والله لى زمن مادخلتا المطبخ ..!! لكن حلفتا الا اضوقكم ليها ..عرفتى …!!! ( تاااانى عرفتى ) (يمرقنا الله من عرفتى دى الليله ..!!! ( والله العظيم عرفنا ) ….( بتكونى المطبخ ده ساكنا فيهو سكنه) …!! اها (عصعوص ) طبعا مغيوزه منى من المره الفاتت ديك …!!! قالت لى وين ياعلوب شكلك جالدو …!! بالزهجه قلتا ليها ايوه جالدو ….!! انتى غايتو كان واصلتى الصيام ده ماظنيتك بترجى العيد ….!! قالت لى صحى مرمى الله مابترفع …!! ( ناس امنيات وتقوى يضاحكن ساااكت ….!!) بس بعد شويه كلهن اتسحبن ذى الحرامي لاحقات المسلسل ….!! زووول كشكر للتراويح مافي …..!! اها المسلسل ده بنتهي …!!! جبل العده الراجيكن ده البنهي شنو …!! .فضلت امنيات وتقوى قعدن مع مشاعر يرتبن فى البيت ويضايرن فى الحاجات ويغسلن العده …!! (عليك بهن يا اختاه ) …..ديل الزيت …..!! ناس اميرة (لوترى) (وعصعص ) ديل حدهن السيلفى ……!!! (سيلفي والعده خلفى ) ….!! واللمه تحلى فى رمضان ……….عرفتى !!

Leave a Reply

Your email address will not be published. Required fields are marked *

error: Content is protected !!