“يوميات علوب” (57) … عرس إيمان

لم يخرجها من الحاله الا تصريح من سنيه إنّو (إيمان ) بت جيرانا حيعرسوها في العيد …!!
لعلكم تذكرو هذا المقطع قي عزومة رمضان قي بيتنا
…اها الليلة كان عرس (إيمان ) وحالة الطوارئ معلنه في الحلة من
امبارح …!!! (دي إيمان القالت عليها (ملكه ) بركه العرسوها بي شناتا دي ) ..!! (الشنا شناة الطبع ياملكه..!! هسه انتي سماحتك نفعتك بي شنو مع (الدراب ) البترمي في ده …) ….!!
المهم طبعا ( إيمان ) بت حلتنا واخوها ( أمجد ) ده صاحبنا شديد فمشينا عليهم من الصباح لو في حاجه نعملا معاهو …!!! قالو العقد الساعه أربعة ونص في مسجد السيده سنهوري ..!! (انتو قصة السنهوري دي موضه ولاشنو ) ..!!مايعقدوا لينا في اي جامع قريب هنا ..!! نحنا ناقصين مشاوير
المهم درعنا جلاليبنا ومشينا علي العقد ….!!! وصلنا هناك ولحدي بعد الصلاة أهل العريس ماجو ..!! قعدنا حبه كده ولسه ماجو …!!!! لحدي الساعه خمسه مافي زول ظهر …!! الناس بدت تقلق ..!!! والموبايلات اشتغلت …!!! دون اي تصريح رسمي مفيد …!!!
اها وكت جات خمسه ونص كده ..!!! بدأ الهمس جَهْرًا…!!! ياخوانا في شنو ..!!؟ الحاصل شنو ….!!؟….!! ولا مجيب …!!!
لكن ماهو ثابت ان هناك شي ما حدث ….!!!
وفضلنا وحاتكم منتظرين …..!!!
وسط هذه الأجواء جات عربتين كده فيهم جماعة قالو انو أبو العريس عيان شديد ….!! والقصة دي حتتأجل شويه بعد صلاة المغرب …!!! تتأجل ..!!؟؟ (ده عقد ولا مباراة )
(غايتو يا إيمان اتاريها مالشنا براها….) …!!
المهم الجو تنشن واتكهرب …والنَّاس صنت ..!! وحسيت بي ( أمجد ) ذي مرتبك كده ومحرج …!! اخدتو بالجنبه وطمنتو انو ياخ القصة دي عاديه والنَّاس ظروف …!! (غايتو اتصبر شويه ..)
المشكلة هسه فينا نحنا ديل …!!! ياربي تقعد نرابط في الجامع ده ..!! ولا نمشي ونجي ..!! ولا هو ذاتو في شنو…!!!؟
اتصلت بي مشاعر تديني شمار الحله …!!! واريتني لو ما اتصلتا ….!!
يشهد الله بس وكالات الأنباء ..!! وكل وكاله عندها قراءة مختلفه
للحدث …!!! ففي تصريحات لي فوزيه والرضيه قالو انو أم إيمان اتشاكلت مع أم العريس ..!! واتهمتا بأنهم (خمشو) من الشيله واتغاتتو في المهر …!!! وتصاعدت الأزمة وخرجت عن السيطرة ..!!! (دي الروايه الاولي) ….!!! (ملكه ) قالت اصلا العريس كان داير أخت إيمان الصغيره ..!! قالو ليهو مخطوبه ..!!! واكتشف امبارح انها مامخطوبه ..!! فزعل ..وجلا الموضوع ……(وكدا) ….!!!ا يلا ناس صفا قالو اصلو إيمان دي من يوما شوم …!!! اخر مره مشت معاهم حفله ..!! الصيوان وقع …!!! والعروس (اتفنقلت ) والوصلة بتاعة شعرا وقعت …..!!! (وديل افادتم لايعتد بها كثيرا …!! بكون في شوية (مغسه ) انو إيمان عرسوها وهن لِسَّه …!!! واشك في رواية شعر العروس الاتملص ..!! بكون طويل وماعجبم ….
واخيراً ظهرت (رويترز ) شخصيا ..(المعلمة أمونه)….!!!!
…اصلها لا خجلت ولا اتضايرت ….قالت إيمان كتبت العريس واختلفت مع الفكي في القروش …فقام الشيخ فكا العمل …!!
(الله لاكسبك ياشيطون …ولا غزا فيك بركة ..محنتي ابليس) ..!!
اها قلتا ليها اها وانتو قلتو شنو يامشاعر ..!!!؟ قالت لي والله نحن بس كاتلنا الشمار ..!! ومتابعين عن قرب …(بتابعي انتي يالبيت الأبيض ) ….!!!
وهكذا تصدر عقد إيمان ( المينشيتات) في الحلة …واصبح الخبر الاول ..!! وطغي حتي علي العيد …!!!
ده كلام ده …!!! اها في قعدتنا ديك جا (بوكس ) تاني مليان قالو خلاص نعقد …!!! الراجل فعلا كلن تعبان شديد وهسه طلعوهو من العناية المكثفة …..!!! وتنفس أمجد الصعداء ….!!! وفعلا تم عقد قران (إيمان ) علي (مصباح ) …(ده العريس ) ..!! قربتا تطفيها عامل راسك الكبير ده …!!
اتصلتا علي مشاعر لقيت خبر( العقد) وصل للنسوان قبل مانحنا نبارك ..!! سامع ليك صوت الزغاريد في الموبايل ….!! بس نفسي اعرف الخبر ده وصل كيف ..!!!؟ لانو قطع شك الطريقة الوصل بيها دي أسرع من الواتس …!!!
اها ياامونه …عقدو …!! موتي الليله …!! عرفتي ليه عرسك أتأخر ….!!!!؟؟
الغريبه الناس دي كلها تتمني ليك الخير ..!! أول مالخير يجيك ..!! في ناس بنطو …!! (جهجهتو باكات الخير يعلم الله ) …
الليله كان يومك ياسنية (الناطق الرسمي باسم الحلة ) ..!! طلعت معيدا مع ولدا في جده …!!! (كان حسمتي الفوضي والتصريحات المتضاربة دي ياخ ..!!!) و كان وريتينا ابو العريس مالو ..!!!؟ وراقد وين ..!!؟ ورقم غرفتو كم …!!
الف مبروك يا إيمان ولادة متعثرة …!!! لكن القون صحيح …. الله يسعدك ويهنيك ..

Leave a Reply

Your email address will not be published. Required fields are marked *

error: Content is protected !!