“يوميات علوب” (60) … عرس (بسمات)

أمبارح كان عرس بسمات ( عباس ) …!! ونحن من يوم رحلة العيد ديك في حالك تنسيق كامل معاها ودي اقل حاجه نقدما ليها المهم هي ذاتا داخله في الموضوع وشغاله معانا كأنو ده عرس واحده تانيه ماعرسا … !!!
أول حاجه كان شرطها الوحيد انو العرس مايكون في (صاله) …!! قالت لازم يكون في نص حلتم دي ..!!! وهي جنها وجن أعراس (الصالات ) …قالت دمها تقيل وبايخه وبتحس بيها كلها بتشبه بعض ..!!! وانو دي حفلة في تلاجه …!!! تفتقد طعم المشاركة الحقيقية ….!! قلنا ليها أبشري اصلا لينا زمن كايسين لينا عرس حلة ( بكسر الحاء ) …!!
المهم يازول فعلا قضينا معاهم كل الحاجات والشباب والله ماقصرو وبسمه تستاهل ..!!! اصلا هي عندها اخو واحد اسمو (حافظ ) بنعرفو من ايام الجامعة كان بجي لي اختو دي … ود ظريف جدا ولطيف..!! (الظاهر البيت كلو كده) ….!!!المهم يازول هم اصلا عاقدين …!!! الصيوان عملناه في نص الفسحه القدام بيتم …!! ماخلينا لمبه حايمه ..!!! وكان الطلب التاني من العروس انو يغني ليها ( البعيو ) …قالت لانو ابوها بحبو …!!! (ياسلام عليك يابسمه ياخ …) …
وفعلا كانت حفلة تشبهها …!!! اول حاجه الناس دي كلها مبسوطة والحله كلها حاضره …والعروس جات من الساعه تمنيه قالت جنها وجن العروس البفوتا عرسا …!!!
والله لمن معاذ وبسمات ديل جو داخلين بس هلال مريخ …!!! الناس دي فرحانه من قلبا …!!! وهي كمان في الحله دي رقم مهم …..!!! يازول قعدو ليك في (الكوشه) ….!! مش العروس بتقعد مسكينه كده تحنن …!! (بسمات ) دي تشيل وتقالد وترحب …!! مشيت جنبها كده قلتا ليها انت يا( عبس ) ماتتقلي شويه …!!! قالت لي ماتضحكني …!! الناس دي كلها بتعاين لينا…. جات مره كبيره كده متكلنها تكيل ..!! تبارك ….!!! بسمات دي وقفت علي حيلا …!!! قالت لي زح زح ياعلوب دي (الزينة ) عمتي …!!! ياحليلا عيانه جات…. !!! فعلا قلدتا شديييد .. وباركت ليها ومشت ….!!! قالت لي دي (الزينة ) الحنينه ياخ ….بريدا من جوه قلبي ….!!! عليك الله ياعلوب حصلا (باستني ) شديد مايقوم المكياج ده يسمما شعرتا بيها ذي اللحستو كده …!!! انا داير أقع من الضحك (حتي في مثل هذا اليوم بسمات لم تتخلي عن شخصيتها وبريقها )
بالمناسبة طبعا بسمات مامشت (كوافير صاحباتا هن الاستلمنها …!!! قالت (الكوفيرات ) ديل ببشتنو العرايس … وبلتخوهن …!!! والعروس بتبقي ماياها …!!!
اها وقالت كده الحفلة دي دورت ( والبعيو ) ده حسا انو في بيتو …والله غني كما يغني من قبل …!!!بعد شويه جا خاشي ( أوباما ) انا لما شفتو ذاتي اتحيرتا لانو فعلا يشبه (أوباما ) الأصلي ….!!! المهم الزول ده الظاهر من أعمدة الحله دي …!!! أول حاجه لابس ليهو لبسه كده قاطعا من راسو ده …!!! الحاجه التانيه ماشغال بي اي زول ….!! بس يوزع في الابتسامات ويرد في التحايا ..!!! وشكلو أشهر زول في الحله …!!! والله الشفع ديل لما شافوهو …خلو اي حاجه ..!! بقو بس مركزين معاهو …!!! دايرين يطيرو من الفرح ..!!! وقاطرنو ليك ..!! ( أحسدك يارجل وانت تملك كل هذه المقدّره علي إسعاد الآخرين ) ….!!!
اها العروس ذاتا اتشابت ..قالت لي ياعلوب بارك لي …(أوباما ) جا عرسي ….!!! يبدو انوٌ الرجل علي ظرفه هذا فهو ضنين في حضور المناسبات..!!!
…!!! اول حاجه عندو رقصه مشهورة جدا هنا …!!! والله الساعه العمل منها مقطع وهو داخل ..قسما بالله الناس دي كوركت كأنو جا قون …!!! وقال كده مشي علي العرسان يبارك….!!! والله ( بسمات ) وقفت علي حيلا وحيتو ….واكرمها برقصة في المنصة ……وهي تبشر …!! والضحكات تتعالي ..!!! والبعيو نزل من المسرح كمل الرصه …( انه الفرح عندما يحلق ) ..!!!وهاهي روحك الجميلة يابسمات ترفرف فوق المكان …!!! قالت لي امشي ياعلوب (كرا ) لي معاذ ده جيبو يسلم علي (أوباما) ده …ومعاذ في دايره اخري في العرس مع أصحابو الصيادلة ديل (خاتنو قرض) …..!!! ودوائر اخري فيها أعمام بسمات واهلها يعرضو ساااي …!! وبنات الحله في النص …!! وكل الدوائر مشغوله حاليا …!!! وزخات الفرح تهطل بكثافة ..تكاد ان يظهر لها شكل ولون …!! وما أجملها ليله..!!! وعمك الماحي ابو (بسمات ) يوزع في الابتسامات كما الحلوي …!!! وعلي الجميع …!!جا بارك لي (بسمات ) قلدتو مادايرا تفكو ..!! ولأول مره أري دموعها …وهو يتمني لها كل الخير …!!! همس في إذنها ..(تاني البعصر لي رجليني منو يابسمات ،..) وبكت هي من جديد ..
وساقتو ليك علي البعيو تبشر معاهو ..!!! والله عمك لما عمتو وقعت …!!! وأخوات بسمات يكفن في الناس ويعشو فيهم ….!!! بسمات قالت لي اهم حاجه (ابراهيم ) اتعشي ..!!!؟؟
(ابراهيم )ده دفعتنا برضو …!!! طوالي كان لاعب ضاغط مع (بسمات ) دي ايام الجامعة …قلتا ليها اتعشي ومرتين كمان …!!بس
جا ماري بي جنبنا (بسمه ) قالت لي الظاهر ليك يومين ما اكلتا قالو صحنين ..!! (يضحك ساكت ….)
شعرت الليلة بانه عرس الجميع …!!! ومن لم يجد مساحة في الداخل اعتلي (الحيطان ) القريبة من الصيوان …وقد تبعثر (الطوب ) من علي سدتها …!! ولم يعيروه اهتماما..!!! فهنا (نفاجات ) الفرح والتواصل الحميم لاتعترف بالجدران العازلة
والكل يبارك للكل …!!! والبعيو المنتشي …ختم بست الودع لي كشكشي …. !!!وهو يصيح ارمي الودع …شوفيهو لي كان فيهو شي …شوفيهو لي ماتختشي …اي شي …!!!
خذلتك بسمات الليلة يالبعيو فهنا يوجد ……كل شي !!..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *