“يوميات علوب” (61) … انقلاب حلتنا (النموذج التركي)

غايتو الزول لما يكون فاكيها في روحو ..!! ويادنيا مافيك الا انا …!! حالتو بتكون صعبه ….!!! اها بس ده ياهو كمال جارنا في الحلة دي …!!!الزول ده شغال مدير واحد من البنوك الكتار ديل التقول نحن في (سنغافورة ) ….!!! والحقيقه هو مش مدير البنك الكبير ذاتو …!!! مدير( ولدو ) ..!!!يعني فرع كده ..!!! لكن بالله الحق تحلف تقول مدير (البنك الدولي )
أصلا ولا شايف زول …!! وكان سلمتا عليهو احتمال كبير مايرد ..!!! وعندو احساس كده انو هو المسؤول عن الاقتصاد السوداني ..حتي لو جابتو مناسبة في الحله بجي داخل في الشخصية … ولازم ينفحنا بي واحد من التعليقات ( السمجه ) ديك ..!!! يعني اخر مره في بيت بكا كده ….والناس مدورين في الغلا ..!! والمعيشة وحالة البلد … قال ابدا…!! المشكله ما في الاقتصاد …!!! المشكلة انو الناس ذاتا ماعايزا تشتغل …!!؟؟ ..ياسلااام ….الصفقه لي كمال …!!! ….(يازول ماتتطما ..!!
اها ده ياهو كمال …!!! المهم انو الوجيه كمال ذي عندو نيه يعرس في مرتو وهي اصلا قريبتو …!! اسمها ( إقبال ) وياها ذي راجلا ده رافعة القزاز …!! ومكبرا اللفة ..!! والكلام كلو …!! كمال استشاروهو في الميزانية ….!!! وكمال في لجنة السياسات …!!! وناس كمال ماشين مؤتمر المصارف في بيروت …!! بس دي ياها الونسه …!!ونسوان الحلة طبعا نوع الكلام ده مابنفع معاهم وبرفع ضغطم …!!!
تقومي يالمخابرات التركيه ناس (فوزيه والرضيه ) رصدو بعض المعلومات عن توجه كمال نحو إنجاز زيجة جديدة …وانو في بت ساكنه في (المهندسين ) شغاله مع ناس كمال ديل في البنك هي الهدف …!! والبت اسمها ( ابتهاج ) …(والله تتابعي كمال ده …!! قدر بهجتك دي يشيلا …!! ) المهم هي ذاتا بت صغيره كده وخريجه جديدة وقالو جات بس تتدرب …!!! طوالي ملك الاقتصاد ده قام شغلا بناء علي الخبرة ….(الا يكون حسب ليها سنين الجامعة) …!!
اها مع السيرة (العظيمة ) لكمال ومرتو في الحلة ….. ازدادت حدة التحريات وتحليل البيانات ورصد التحرك والتأكد من صحة المعلومات حتي وصلت الذروة وتم اختراق الهدف نفسو لانو أهل ناس (الرضية ) طلعوا جيران ناس ابتهاج في (المهندسين) ..!(غايتو الخرطوم دي مافيها انقلاب بنجح …!! )
وبالفعل تم تأكيد الخبر ..!! وانو كمال عايز الموضوع ده بتم في سرية ….وبعد داك يحلها الحلال ….(وإقبال ) مرتو تبقي امام الامر الواقع …!!
وبدات ترتيبات الانقلاب المضاد في الحلة ..!! وحدث انقسام …!!!
فريق عايز القصة دي تتم (كيتن ) في (اقبال ) الرافعا نخرتا ..!!! وفريق اخر عايزا تطرشق عشان كمال الشايف روحو …..!! خياران احلاهما مر ..!! وكان لابد من اتخاذ قرار ..!!! انتصرت وجهةً النظر التانيه….!! وتقرر (احباط الانقلاب ..!)
انا طبعا القصة دي كلها جابوها لي ناس مشاعر …ديل طبعا (الخلايا النايمه ) …رغم انو الإعداد كلو والتفاصيل ماسكاتنها الجنرالات الكبار … ناس (الرضية ) (وفوزيه ) وفرق العمليات ديل ..!!
قلتا لي مشاعر وهم ليه عايزين يعملو كدا ….!!؟ قالت لي عشان يضربو عصفورين بي حجر واحد ..!! اول حاجه هن اصلن عندهن راي في (كمال ) …ومره وصلن تعليق انو قال …(نسوان الحلة ديل غير منتجات ..!!! وماعندهن شغله غير الونسه والقهوة …!!! ) اها دي مانسوها ليهو …،!! والسبب التاني والأهم..!! انو قصة التعدد دي اصلن بتزعجن كفكره …لذلك تجاوزو (إقبال ) من اجل الهدف الأكبر والأسمي …!!!
وانو احباط المحاوله بالنسبة ليهن أبسط من شراب المويه…!! وهو فقط تمليك المعلومة لي (إقبال) والانسحاب التكتيكي …
وبعد داك بتكون المعركة معركتا..!! وهن عارفات بتحسما كيف …!!! (ابليس يتابع بإعجاب )
بقت المشكلة الكبيرة انو كيف يوصلو ليها الخبر ..!!وباقل الخسائر الماديه ..!! ودون وقوع ضحايا …!!؟؟
طوالي جات في بالم (امونة الشيطونه ..) قالو بسس مافي (انتحارية ) غيرا ممكن تنفذ هذا المخطط
وبقي السؤال ..!!؟؟ منو البكلم (أمونه ) ذاتا..!!! لانو( أمونه) من غير تحقيق حتفتو …!!! مابالك اذا القصة اتطورت وجابت ليها تحقيقات …!!!
وفي اجتماع تشاوري اجمعوا انو (أمونه ) هي الخيار الانسب
وتبرعت (سنية ) (مساعد هيئة الأركان ) انها هي الحتكلما لانو قالت اصلا بعد داك (إقبال )
بتكون مركزا في قضيتا الأساسيه ومافاضيه لمعارك جانبيه
……!!! وقد كان …!! وجاءت ساعة الصفر
سنيه كلمت أمونه …!!!
أمونه ماباتت بالخبر…!! لفحت توبا المغربية ومشت لي (إقبال ) فتتو ليها ذي ما الله خلقو وجات راجعا …!!!
الساعة تسعة كمال كان في التحقيق الانفرادي ..!!!
تسعة ونص نكر التهمة جملة وتفصيلا …!!!
عشره صباحا ابتهاج اترفدت من الشغل …!!! في أسرع عملية توظيف وانهاء خدمة ….!!
(سنيه )ياها ديك ترجف لانها ما متوقعا ابدا انو (اردوغان) دي حتحسم القصة في نص ساعة …!!!
وكمال عرف الله واحد ومن اليوم داك بسلم حتي علي شفع الحله
…!!!!!
اها يا ابوكمال خلينا من السياسات الاقتصادية …..!!! رأيك شنو في الأمن الاقتصادي ده ..!!؟؟
هسه لو كنتا بتسلم علي ناس الحلة ديل ماكنتا ذي الوقت ده
قااادل في ماليزيا …!!! (وإقبال ) قايلاك في مؤتمر المصارف في بيروت …!!! ؟؟
داير تبتهج مع ابتهاج والجنيه زعلان ..!!؟؟ اتلومتا لكن …!! كان تسأل (اردوغان) !!..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *