“يوميات علوب” (63) … زراعة (الشفون)

قابلتا واحده من زميلاتنا الزمان في الجامعة صدفه كده في مول الواحة …!!! لقيتا ليك مخمخمة الاكياس …وقااااشره…!! ومفتاح العربية ده رابطنو ليك بي ضنب كديسه ولا شنو ماعارف …!! والموبايل برضو ضنب أرنب …!!! المهم باقي (الكلب ) بس ….!!!
وانا أقول ياربي البت دي انا شايفا وين ..!! شايفا وييين …!!! لحدي ماقالت لي هيااا علوب ….طوالي اتذكرتها ،..!!! طلعت زميلتنا كانت في الجامعة اسمها ( نضال ) قرت زراعة ..!! المهم اتسالمنا بعد سنوات من الانقطاع .. قالت لي والله ياحليلك ياعلوب ياكا ذاتك ماشاءالله ..!!! قلتا والله وانت كمان ….!!! لكن ذي سمنتي شويه كده …!!! ( طبعا مرات انا عندي مشكله…!! برمي حاجات كده بتخيلا عاديه لكن في الحقيقه بكون رميت قنبلة …!!! ) اتاري (سمنتي ) دي عند البنات خط احمر …!!! بالله البت دي لما وشها اتغير…!!! طوالي لفيت الموضوع قلتا ليها لكن صدقي ماشاءالله يانضال أصلك قيافه ….!!! بس هسه أجمل …!!! حتي شويه وشها ده اتفرد …!!! وطوالي قلبتا الموضوع ….!!!
اها وين هسه …!! وشغاله ولا بتعملي شنو ..!!؟ قالت لي ابدا عندي شغل خاص ..!!! بصمم تياب ..!!! وعندي محل …!!! قلتا ليها هسه عليك الله( الزراعة ) القريتيها دي علاقتا بالتياب شنو ..!!؟؟
طوالي قالت لي بعمل ( تياب مشجرة) …!!! ضحكتا ضحك …قالت لي زراعة شنو انتا كمان ياعلوب هي وينا الزراعة …!! خلينا من (الشتل ) بتاعك ده …..!!! اها النبي انتا ماعرستا نهدي ليك توب للمدام …..!!! قلتا ليها انتو خليتو فيها عرس مع تيابكم الغاليه دي …!!! اها وان شاءالله التياب مامقصره معاك ….قالت لي والله الحمد لله ….!!! هسه بشطب في البيت …..!! والله كلام ماشاء الله اقعد انتا ياعلوب (شطف ) في البيت ….!!
اها قمتا سألتها من واحده كده كانت صاحبتا شديد أيام الجامعة ديك طوالي بكونو مع بعض اسمها ( أناهيد ) …!!! قلتا ليها وويييين فردتك أناهيد …!!؟ اخدت ليها صنة كده قالت لي لِسَّه فاكر ….!!! وين ياخ ..!! ( اناهيد ) بقت البلزها مابرميها …!!! قلتا ليها كيف الكلام ده …!!؟ طوالي عزمتها علي قهوة كده في المول تتم لي القصة بتاعة البلزوها مابتقع دي …نوع القصص دي بتلهمني ..!!
قالت لي (اناهيد ) انت عارفا من زماااان ماقاعدا في الواطا
قلتا ليها اها عملت شنو …!! قالت لي اناهيد ياسيدي فتحت ليها محل صغير كده بتاع (هتش ) البنات ده…!!! حلقان وغوايش وإكسسوارات وحاجات ذي دي …اها الأمور مشت معاها كبرت اللفة شويه بقت تجيب كريمات وحاجات الشعر دي …بعد شويه فتحت ليها صالون نسائي كده …!! قلبتو لي مركز تجميل …!!! شويتين المركز ذاتو عملت ليهو فرع …!!! اها وسوت ليها لقاءين كده في التلفزيون …بقي اسمها (أناهيد لي اللوك الجديد) …..!! هسه عندها تلاته مراكز ومدير اعمال…..!!
انا عشان ألم فيها ده موضوع …!!! هسه قبل يومين نزلت ليها برادو ٢٠١٦ …!! دي اناهيد ياسيدي …!!!
عاينتا كده لقيت في جيبي مية جنيه …قلتا ليها قولي لي (اناهيد) مادايرين ليكم حراسة للمحلات …!!!!
اناهيد طبعا درست (اداب ) تاريخ ..!!! وهاهي تعيد رسم التاريخ …!!!
عليك الله شوف البنات المفتحات ديل …!!! عارفاات محل
القروش وين ..!!! ونحنا لافين …!!! تاني يامشاعر لكن انا جنيه واحد بديك ليهو …!!! اتاريك بتشتري (البرادو ) لي (اناهيد) وانا قاعد علي الحديد…!!
قلتا لي نضال اها والتوب بي كم عندكم هسه ..!!؟ قالت لي
حسب …!! من مليون لحدي خمسة ده اخر واحد واحد اسمو
( عصافير الخريف ) قلتا ليها هو بالله الخريف فيهو عصافير ..!!! الغريبه لِسَّه ماجو طايرين علي حلتنا ….!!! وتوادعنا علي أمل لقاء …..!!
..هسه عليكم الله ناس الجامعات ديل لو دخلو التطريز والمكياج ديل كمواد إضافية ماكان حلو مشكله ….اها (نضال ) زرعت ليكم الحرير ….!!! الأغلي من القطن …!!! والحاله بره المقرر.!!
ومابين (عصافير ) الخريف (ومجاري ) الخريف …انا وين أقيف !!..

Leave a Reply

Your email address will not be published. Required fields are marked *

error: Content is protected !!