“يوميات علوب” (64) … زيزو يازيزو …والحرق قلبي

مشيت محل كده في شارع خمستاشر اسمو (الحاوي ) لكن هو صحي (حاوي ) …!!! اي حاجه عندو…!!! والزباين ديل بالصف (بِسْم الله ماشاء الله ) …!!! والخمسينات دي تتطاقش ونضيييفه…( انتو الناس دي بجيبو القروش الجديدة دي منو وين ..!! )…!!؟؟
اها انا اصلا الوداني هناك كنتا داير لي حجر بطاريه النوع المربع داك قالو لي بتلقي في المحل ده …!! يازول نسيت ليك الحجر ذاتو بس بقيت أتأمل في الناس دي ..!!
جات واحده كده كاشا ليك أولادا ديل قداما …!!! نزلو من العربيه … !! عندها ولدين وبت …!! البت اكبر واحده فيهم ذي اتناشر سنة كده …!!
اها اصغر واحد ده النوع المدلع ولديح داك …!!! زهجني زهج ….!! اي حاجه قال دايرا ختوها ليهو في السلة…!!! والله في حاجات هو ذاتو ماعارفا دي شنو …!! برضو ختوها ….!!! وماشاءالله تبارك الله قمة الأدب …!!! لو قالو ليهو …لا …الحاجه دي عندك في البيت …!!! بياخد لي (سرخه ) كده ذي الإسعاف …!! ومابقيف ..
(اريتك كان تبعي كان دقيت بيك الحيطه دي …!! ) الغريبة بعد (الكوراكا) دي طوالي بشيلو ليهو الحاجه القال دايرا …!! (لما انا ذاتي فكرتا اكورك …)
اها جا اخوهو الاكبر منو انا قلتا ده عاقل شويه ….طلع كمان قايل قول …!! الحلاقه بالجنبات ومفلفلين الشعر والنضارات …!! شايل الموبايل (الجلاكسي) اشتري رصيد بي ميه ….!!! (ياربي يكون داير يكلم (بان كي مون ) ….) ..!!
اما حبيبة أمها اختم الكبيره فدي تقريبا قدر عبير اختي كده ….!!! لكن داخله في الشخصية ….!! مركزا بس مع الموبايل ..!!! ماشايفا قداما ..غايتو انا مما الله خلقني ماشفت لي مسجات بتتكتب بالسرعه دي …!! وباليدين الاتنين…وتتبسم
(والماما )واقفه منتظراهم يكملو ( الشوبنق ) عشان تحاسب …
اها الشافع الصغير ده لِسَّه مدور …الظاهر ماشبع داير يشتري …..!!! بتصدقو الود ده حايم جوه المحل جا خامي ليهو بشكير…!!! اي والله (البشكير ) الواحد بتاع الحمام ده ..!! قال دايرو….!!! انا هنا اتجلطا ….!!! بس الحمد لله ربك رب الخير أمو اتدخلت المره دي ….!! ….لا يابيبي حقك أحلي منو ……!!! (اريتك كان ماادخلتي …) ….انتو قايلنو اشتغل بيها …!!! طوالي شغل الانذار ….وااااااك …!!! لا لا لا عايزو بس ….!!! والست الهانم تدخلت من جديد … لا …كده غلط ..!! عيب يازيزو ..!! ( كتري لي من زيزو دي لما يزوزي بيك ..) …وهو زوزا وانتهي …بس قامت ليك عليهو … زييييزو… قالتا بي نهره كده….. !! انا قلتا الحمد لله خلاص فرجت … !! الكف وقع …!! ( فتعدت سقف طموحاتي ) قالت ليهو والله يازيزو تسرخ كده الليلة مافي (بلي ستيشن ) ..!!! ده الكنتا خايف منو ..!! حرام عليك حطمتي الولد ( اللهم أجرنا في مصيبتنا ) ….!!!
والله ياخوانا في اللحظه دي ما اتذكرتا الا (الكجم ) شافع
جيرانا ..!! اول حاجه غاتس في موية المطره لحدي اضنينو
وامو راجياهو في القيفه بالبسطونه …..!! والحله دي كلها تحنس ترفع عنو العقوبه ..!! وبعد مفاوضات ..الكجم سلم نفسو..!! وبعد ده كلو أكل ليهو شحطة ذي الشطه …!! (ده طبعا بعد تخفيف العقوبات ) خلتو يرقص برا …!! وجري علي البيت ….!!! غايتو جريه لو استثمروها كان (الكجم ) هسه في منصة التتويج في (ريودي جانيرو ) ذهبية المية متر عدو …فردي رجال ..!!
نرجع لي ( زيزو ) يبدو انو التهديد بالحرمان جاب راسو …جدع ليك البشكير ده في الواطا….!!! وجدع معاهو الشكولاته …!! ونفخ الجضوم حبيب ماما ….!! والله ياخوانا امو دي دايرا تبكي ….( ياحليلك بكيتيني معاك ماقادر اشوف زيزو منكسر ) …!!! هل بتصدقو اشترو (البشكير) …!! (اللهم لا نسألك رد القضاء ولكن اللطف فيه) …!!
غايتو ياكجم بعد السباحه السبحتها دي ياهو السوط ده البكون دفاك …!!! هسه انتا ماكنت أولي بي بشكير (زيزو ) ده بعد ( الحمام المغربي ) الاخدتو في نص الشارع ده …!!!
اها البت غايتو ماشالت حاجه كتيره ..!!! كم شامبو كده وشوية رصيد بي ميه برضو …!! اوختو (الكرور ) ده كلو للكاشير والحسابه بتحسب…!! ودفعو الكاش بدون نقاش ….!! (فوزيه جارتنا واقفه ساعه مع عمك (يس ) سيد الدكان بتفاصلو في طماطم ..وفي النهايه نبذتو قالت حرامي ….!!! )
ان شاءالله بس تكون اتبسطا يازيزو…. والبتاكلو ينفعك يابيبي …وتقطع (البشكير ) بي عرق العافيه ان شاءالله ..!!! انا شخصيا خليت حجر البطارية بي سببك…بتصدق …!!!
الحسنة الوحيدة وانا راجع علي البيت (زيزو ) ده الهمني بي فكره أني أقوم أغلف اللالوب ده واركب ليهو عود اعمل منو (حلاوة حربة) …!! احتكون حاجه مختلفه (سودانية المضمون أمريكية الشكل ) واجيبا للحاوي ده يسوقا لي …ناس (زيزو) ديل زباين فوق العاده مابتفوتو …!! وأسجل المنتج بي اسمي…!! ( علوب ملك اللالوب) …بس علي شرط في المحل يُسموهو
Aloob sweet …..
( لالوب ) دي ماظنيتا ترضي غرور (زيزو) …!!
إنشاء الله تعجبك يازوز …والبتاكلو ينفعك الغالي …بسطونه واحده من حقت الكجم دي كانت حسمت الفوضي الانتا فيها دي ….!! تاكل (الحمط رمط) ….!! بتعرف (الحمط رمط) ..!!! مبروك يا ام زيزو أضفتي للمجتمع (متسكع ) جديد ..

Leave a Reply

Your email address will not be published. Required fields are marked *

error: Content is protected !!