“يوميات علوب” (67) … امريكا شيكا بيكا

غايتو الله ده وكت يقول ليها كوني مافي حل غير تكون…!!! انا امريكا دي لوتري ماكان جابني ليها…..!!! بتصدقو نفس (الكلب ) الوداني لندن جابني هنا ….!!! اتاري جمعيات الرفق بالحيوان دي منتشره في العالم اكتر من الرفق بالانسان ….الله يخليك ياليزا هي الرشحتني ….!! طبعا لو شافتني فالق كلب جيرانا قبل يومين شارط جبهتو كان جاتا صدمه …..!! هو كمان السقيل سكا فطوم جايه من المدرسه قطع نفسا ….فلاحتو في جنس ده …يوم واحد ماسمعنابيهو سكا ليهو حرامي ….(يكونو كترو عليهو ياربي ..!!؟؟ )المهم كبستو طوبه لمن فهم حاجه ….!!!
ياخ خلّونا في الأهم ….غايتو الكدايس والكلاب اللاقياها هنا (زول) لاقيها مافي …!!! جنس جديع هو لكن …!!!تخيلو ميزانيتا بس اكل وشراب وعلاج سبعه مليار دولار في السنه …!!! اي والله …ماكذبتا عليكم سبعة مليار….!! دولار ينطح دولار ….!! شوف كلابنا الضاعت وصاعت…. غايتو بس زول يكلمن مافي …!!! لانهم لو بس شمو ريحة الخبر ده …!!!وسمعو بي جنس البحصل ده …!!! كلب واحد حيفضل عندنا مافي ….(البلد دي البحرسا منو …!!) ضحكتا براي اتخيلتا المنظر والكلاب مدفوسه في شؤون ( المكتلبين ) بتعمل في إجراءات السفر….!! وشايلين شهادات الخبرة …(ضلله وزقاقات ) مساكين ماجايبين خبر الدنيا …… قاعدين هنا مصاقرننا النهار كلو يهوهوو بي سبب ومن غير سبب ….!! قرفه بس ….!! ولحمه مافي ….(لانحنا ولا هم ….) ( في حب ياخوانا اكتر من كده ) ..!! والغريبه لقيت ليك هنا اي كلب عندو اسم وملف طَبي …..(بالله الدكاتره بتاعننا ديل ما ليهم حق كان عملو إضراب) …..اها والخلاني اكره اليوم الجانبي هنا انو الحيوانات دي هنا عندها سلالات وملفات وجوازات ..وقصه طويله عريضه ….يعني يقول ليك ده كلب ( سلوقي ) اصلو لاتيني …ودي كديسه شيرازية اصولها من ايران…..ولقيت واحد قالو ده ( دوقو الارجنتيني …) (ده بكون لعاب خلاص …!!! ) غايتو نحن البنعرفو كلب ناس حاج التوم …(ادوهو اسم العايله ذاتا…!!! ) ابو الزفت ..!!غايتو في دي نحن اتقطعنا … …!!!!
اها وأي كلب بي اسمو واسم أبو …!!! كلب واحد عندنا هنا ماسمعتا عندو اسم …!!! بس شابكنهم …جرررر …يجر مصارينك علي قلبك ….والقالو ليهو (جركاز ) ده ماخلو ليهو حاجه ….(كلب العز والعجن) ….
المهم. ماعلينا خلّونا من الكلاب وسيرتا الله لا جاب باقيها ….
المهم وصلنا الي مطار (دالاس )الدولي اها الأمريكان ديل مازي
الإنجليز …فاكنها حبه كده …!!! يعني في شوية ضحك في المطار وحبة هزار مع بعض .،،،أديتم الجواز اول ماشافو كلمة (سودان ) أخدو ليهم صنا كده وبدو يتشاورو ….انا قلتا امممممك …قوانتنامو جاك زول ….!! وجهزتا روحي للنشيد..!! لن نذل ولن نهان ولن نطيع ( البرتكان) ….هيااااا اخوانا هو في شنو …. !!؟؟ تكلوني ليك بالجنبه كده…!!( متهم بس ) يمشي واحد يجيني التاني …جاني واحد قال لي امكً مولوده سنة كم …(هم كمان وقت يقصدو ليهم زول اصلو مابتحيرو ..)قلتا ليهو والله ماعارف كدي النضرب نسألا …بتصدقو اخد ليهو ابتسامه كده قال لي برافو انت زول صادق …(صادق في حبي ) …!!! ياخوانا الناس ديل مالم…. اها جاني واحد تاني قال لي سبب الزياره ….قربتا أقول ليها جاي اهني ترامب …..!!!ياخ ماياهو ده خطاب طويل عريض ..،،(جمعية أصدقاء الحيوانات الدوليه تدعو الناشط
(علوب ) لحضور فعاليات الكلاب (والكدسه ) وتأثيرات العولمه عليها) …والله انا ذاتي خجلتا لانو انا شخصيا ماحددتا موقفي من العولمه ….
….غايتو البركه فيها جابتني اشوف امريكا البقولوها دي …..والله بتاعة الجوازات لما عرفت قصة جيتي فضل ليها تحضني ….ادتني النظره الحانيه ديك البغمتو فيها العيون نص نص ومعاها حركة في الخشم كده دليل تأثر …!! أكون ذكرتها كلبا..!! انا ذاتي غرودتا عيوني حبه كده وبادلتها ذات النظرة (الحانية الشفوقه) ….!!! انتو الناس دي ياخوانا قصتا شنو مع الكلاب والكدايس دي …جنس حب وريده ….الله قادر …
المهم واشنطن طلعت مابعيده من لندن ….نفس البيوت وذات الملامح بس الشجر زايد شويه وجايبا ليها زيفه اليومين ديل وهم ذاتم بحبو العضه لافين من مطعم لي مطعم سندوتش البيرقر قدر صينية الجندول … المهم يازول وصلنا ….وفعلا مشينا تجمع الكلاب الدولي ده …غايتو الفرق بينا وبين الخواجات ديل انو اي حاجه بدوها حقها تمام …وبجيهوها صاح من الكلب للطياره …. يازوول جماعتك جادييين ….كلبي وكلبك….!!! وكديستي وكديستك ..!! والحلاقه …وقص الاضافر …!! فضل ليهم يتحننو …!!! وفي جريوات صغار كده ملبسنهن مرايل …..( المريله المالبسا الكجم) …!!وحاله صعبه غايتو ..،.!!نحنا نشيل ونتفرج ومرات نصفق …ماكمان الجماعه داعننا …لازم نحلل الجيه …..(تحلل امريكي ) تحسبو لعب ….!!!
المهم دي الافتتاحية وقلنا كده دخلنا علي( المحشي )لاقينا اهلنا هناك ….والعز أهل ….ذات الطيبه والعذوبة والعزايم
حاحكي ليكم جماعتنا ديل هنا حالم كيف …وعاملين شنو
يلا لي حلقة تانيه من امريكا …..!!!ودقي يامزيكا …….فتكم بي عافيه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *