“يوميات علوب” (68) … سافر من غير تذاكر

 غايتو الواحد لما بلاقي ليهو بت سمحه طوالي بنسي ليك المطره والبعوض والفلسه النحنا فيها دي …!!! الغريبه البنات السماحات ديل عارفات روحن تلقي الواحدة لابده ليك كده في ركن ذي الحمامة …!!
مشيت لي وكالة سفر كده مع واحد صاحبنا اسمو ( التاج ) ماشي القاهره …!! ده كمان بمرقا لي مصر بجيب زراير….!!!! ( الزراير الواحدة دي ) ….!!! قلتا ليهو عليك الله يالتاج انت الزراير دي هسا دايرا ليها مشوار قدر ده …!!!! وهي ذاتا البشتريها منو …!!! قال لي السودان ده كان جبتا ( نمل ) بتباع …!!! غايتو الزول ده جهجه لي النظريات الاقتصادية القريتا كلها ….!! خلينا من التاج وزرايرو الكلام في ( الزراره ) اللقيناها في الوكالة دي قيامه وربطت …!!! لابسين ليك الطرحة دي كيف ..!!! واي حاجه في محلتا والعيون شدة ماكبار لما ماقادره ترمش …!! تشرب ليها في أنناس ماعرفتا العصير في الكبايه ولا الكرسي …!!!؟ بعدين هي النوع داك …الباسم خلقه …وتحسا بيها نعسانه كده وهي مفتحه …!! والكلام براااحه …مش ذي فلانه ديك (ورجغك ورجغك ) بس مكنة خياته ….ولا الظرافه والذوق واللطافه …..والله وقت قالت تشربو شنو …!!؟؟ داير أقول ليها نشرب السم نحنا …ماخلاص شربنا وانتهينا ( وبي سكر تملكني وأعجب كيف بي سكر ) …خلينا نتفرج بس في البتشربي في دا ….
الكويسه حظنا الضارب ده اول مره يصدق ….!!! لقيناها فاضيه ..التاج قال لي البت دي اول مره تكون ماعندها زباين عادة بكون واقف صف طويل عريض نصهم مامسافرين …!!! بس ياخدو ليهو قعده قداما كده اي واحد( يلتخ ) ليهو بلد من راسو وهي تديهو الأسعار ….!! ويبقي مارق …ولا بكون فاهم ذاتو هي قالت لي شنو . …!! اهااا قعدنا ليك انا والتاج في كرسيين قداما اهتمت بالتاج شويه عارفاهو زول (زراير ) وزبون …!!! وانا ( مزرزر ) في النص بس أعاين ….!!! قالت ليهو التذكره عايزا بالمصريه ولا أحسن ليك السودانية ..!! انا هنا ماقدرتا اصبر ..!!! قلتا ليها السودانية لو زيك كده انا ذاتي السودانية والله ياخوانا اخدت ليها بسمه كده …جاني ابو الشهيق ..( بسبوسة وغمسوها في عسل …!!! ) نسيت ليك المواصلات والزحمة والكتمه …!!! آمنت بالله ….!!! قال ليها ده علوب صاحبي ..قالت لي اهلًا بيك اتشرفنا ولو مسافر اي مكان نحن تحت الخدمة ….!!! طوالي جاني صداع …!!!!
قلتا ليها نسافر وين نحنا نخلي البلد دي ….!!! البلد دي لِسَّه بي خيرا ….(والله صحي السودان ده حلو بي ناسو …) …!!! اها التاج حسا بي منبهل كده حاول يلمني ….!!! قال ليها بالمناسبه علوب ده رجل اعمال …قلتا ليها في الحقيقه انا
(رجل رمتال ) …!!! صحيح انا رجل والرجال قليل …لكن لِسَّه الاعمال ماجات …!!! الله يصلح اعمالنا بس ….!!! والله البت دي ادتني نظرة إعجاب كده بي كلامي ده لما راسي لفا…!!! قالت للتاج صاحبك ده زول مريح ولطيف ..!! اتخيلتا نفسي (بندول ) انا غايتو الليله الا (اضبح) …!! بنات الحله عملو لينا نفسيات …!!! موده بت جيرانا ( عصعوص ) شابكاني ليك مالا رقبتك ملويه …!! واضنينك ديل مالم ياعلوب ….!!! وجبهتك الليله ناطا … !! (حديقة حيوانات بس …) تعالي اسمعي (لطيف ) دي …!!! اخدي ليك نقله ….الله لا جاب باقيك ….!!! والله فعلا الدنيا لسا بخير …
المهم التاج خلص حاجاتو …قلتا ليها انت اسمك منو عشان لو جينا مره تانيه ….قالت لي أنا (اخلاص) …!! اخلاص الأرباب…!!! قلتا ليها وانا مخلص …!! مخلص الحباب ….!!! ماشفتو الضحكه الضحكتا النوع داك البتروح فيهو العيون ..!! وممكن تروح فيها انتا ذاتك ….!! اقسم بالله لو عندي قروش كان قطعتا لي تذكره لأي محل بس نعز البت دي …!!! ينعل ابو الفلس ذاتو …!!! الله يحفظك انتي …!! طلعنا من الوكالة والله ذي السافرتا وجيت …!! مرات الزول بحتاج لي جرعات ذي دي في الحياة تجدد الخلايا …غايتو الناس المالاقيا طريقة تسافر
بس يجو لي اخلاص دي يسألوها من التذاكر والاجراءات ويرجعو البيت بكونو سافروا وغيرو جو ….الله يغتيك يا اخلاص قلتا لي التاج (زرارتي ) دي انقطعت لو جبتا ( زراير ) عليك الله اديهم اخلاص دي بجي آشيلم منها …..صدقو قال لي سمح ….!!
اها ياخوانا رحلة سعيدة …كل المطلوب بس حق المواصلات لحدي الوكالة ….تكون سافرتو (اخلاص) …. وشربتو الأناناس
تجو بالسلامة ان شاءالله …ماتنسو الصور !!..

Leave a Reply

Your email address will not be published. Required fields are marked *

error: Content is protected !!