“يوميات علوب” (69) … من اليسع الى علوب (جواب للبلد)

 الليله جانى جواب مرسل مع زول …!! اي والله الجواب الواااحد ده ..!! بتاع زمان داك المكتوب باليد ….ياحليلو …لينا منو زمن احساسو أحلى من الواتس والايميل …المهم اديتو شرطه بالجنبه كده وفتحتو مستعجل داير اشوفو من منو لقيتو من اليسع …!! اليسع صاحبنا الكلمتكم عنو فى يومياتى الفاتت …اليسع ياخ ..!! صاحبنا زول( عسير) الجا من السعوديه وقلتا ليكم كيف كان فرحان بالسودان ونحن مستغربين …!!! وسلم علي سيد اللبن والدكان واى حاجه …!!! طبعا هو رجع ….!!! ورسل لي الجواب ده …!! انا قلتا ياربى الزول ده تانى لحق يشتاق لينا تاني ….!! وجدت نفسى انا الذى اشتاق اليه وأحن …!!! المهم ده جواب اليسع هاكم اقروهو ….. أنا جد حزين …!!
العزيز جدا أخوي وصاحبى علوب …!!
تحياتى وأشواقي …!!! اى والله وأشواقي …!!! لانى جد ماشبعتا منكم….!! كيف كل الاحوال تمام …
وصلت بخير والحمد لله ….!! وشكرا علي الأيام الجميله القضيتا معاكم …!!!
قبل كل شئ ياعلوب عليك الله ماتتحسس من كلامى الجاي ده وتعتبرو زعل …!! والحركات دى مابيناتنا…
انا قريت كلامك فى الفيس ( دخلنا اليوميات كمان ) هههههه…!! والله والله… بحلف ليك…. أنا مازعلان… وضحكتا كمان في بعض الحاجات…!! والجماعة ماقصرو شاغلونى بيها …!! لكن كمان ياعلوب انا داير اقول ليك كلام …وماكنتا بقولو لو ما انتا صاحبى وانا بعرفك كويس…!!! وعليك الله حلفتك بى الله ماتتضايق…!!! بس ده الفى نفسي وحبيت اقولو ليك …انتا مش اخوي …!!!
انا ماعارف ياعلوب هل أنا ذنبي انى كنتا مشتاق ليكم ومشتاق لي اى حاجه فى السودان …!!!! ولا انا عملتا شنو …..!! انتو السودان ده بس لأنكم قاعدين فيهو عشان كده مابتشوفوهو كويس …!! والله العظيم ياعلوب انا بس دايرك تجرب وتتغرب عشان تعرف كلامى ده …!! لما يودوك مكانا مامكانك …!!! وناسا ماهم ناسك …!!!
والله ياعلوب انا لما بسأل من ( خدر ) سيد اللبن..! وانت تضحك …!!! بس لأنك ماعارف انا لما كنتا أقيف قدامو وهو بكب فى اللبن و بسأل عنى وعن ناس البيت ويدعي لينا…!!! إحساسي بكون كيف ….!! عايزك تشوف الفرق وأنا عايز اشترى (اللبن ) هنا من السوبر ماركت ….!!! طبعا بشيلو براى من تلاجه بارده لافيها روح ولا احساس….!!!
و أمشى ( الكاشير ) لى واحد ولا حتى برفع عينو يعاين لي …!!! مشغول فى المكنة …!! همو يشيل قروشو ….ويجدعو فى كيس لايقل برودة عنو …!! وعن تلاجتو ….!!! هل ممكن تتخيل انو ده ( لبن ) بكون فيهو طعم ….!!! ولبن عمك ( خدر ) من محلو ده بكل هذه الدعوات ماشى على ( حلة ) أمى حقت اللبن الخاصه ..!! تقيف فوقو بى نفسا لما يفور …!!! وتعمل لى منو شاى فيهو انفاسا ومعمول بى ايدا …!!! عرفتا ليه بسأل من ( خدر ) سيد اللبن …!!!؟؟؟
ولما اقول ليك الشجره خلينا (سغيرا ) وكبرت ..!!! انت ماعارف انو الشجره دى بتشاغلنى وبشاغلا …!!؟؟؟ بتعرفنى وبعرفا ….!!! هل تعلم انو قدر الشجر اللقيتو هنا زاد احساسى بالغربه ..!! لانو مابعرفني …!! تفتكر ده شجر ممكن يسلم على ….!!!؟؟
لما بسأل عن عمك ( يس ) سيد الدكان ياعلوب امكن انتا بتعرف انو عم ( يس ) ده نحنا مما قمنا فى الحلة دى لقيناهو قدامنا وكبرنا قدام عيونو ..!! انا ياعلوب بشم ريحة دكان عمك ( يس ) ده وحافظ رفوفو …!!! حتى السواد الداخل بين شقوق الخشب ده انا بحسو ….!!! الميزان الخاتى قدامو ده ..!! بوزن راسى …!! والمروحة المعلقا في السقف دى مش قدييمه كده وفوق راسا بانى العنكبوت …!! لكن بتدينى احساس بالحياة والحركة …ممكن تانى تضحك وتقول لي مروحة ( يس ) ولا التكييف العندكم …!!؟والله ياعلوب الهوا البجينى من المكيف الهنا ده غير انو بحسا بيهو فى عضامى من جوه بكسر فيها تانى ماعندى ليهو احساس …!!!! طبعا مستغرب ..!! بس انا بكلمك بى أمانة ….!! انتا قايل ربنا ده وقت قال انا ( العدل ) خلى حاجه …!!! عارف يعنى شنو العدل …!!؟ يعنى العدل المطلق …!!؟ يديك ويدينى بذات القدر والميزان …!! يديك احساس بالأمان والاطمئنان وانت وسط اهلك وناسك ..!! (قد تفقد حاجات تحسا بيها مهمه ) …!!! اها دى بدينى ليها انا …!! لكن وين ألقى احساسك ده ياعلوب …!!! عرفتا ليه انا كنت فرحان وفرحان شديد وداير اقلب (الهوبا ) ذي ما انتا قلتا …!!! عشان الاحساس الانا فقدتو ده …!!! انتا مابتحسو لأنك عايشو …!!! كدى جرب واغترب … كلامى ده بقع ليك ….!!!
انا عاذرك ياعلوب..!! لا انتا حتعرف احساسى هنا…!! ولا انا بلومك على إحساسك هناك ….!!!
بتتذكر ياعلوب لما كنّا بنمشى سوا حفلات (عقد الجلاد ) فى نادى الضباط …!! بتتذكر لما (الشفوت ) ديل يغنو …. (الغربه انشاءالله تعقرى شلتى العيال من بدرى)
…!!! شفت كنّا بنكورك ونصفر كيف …!!! وبنشيل معاهم !!! لانو الوقت داك بنتذكر أصحابنا المشو وشالو معاهم جزء مننا ومن ملامحنا …!!!
العزيز علوب ..!! بكتب ليك الجواب ده وحبيتو يصلك بى خط يدى مش بالواتس ولا الإيميل لانو ديل ذي التلاجه الشلتا منها ( اللبن ) ده هسه وراجع بيهو البيت المكيف وكهربتو شغاله …!! بس مافيهو ريحة امى ..!! ولا طعم اهلي …!! ولا لمة اصحابى …!! برضو عايزنى ما افرح لما جيت ..!!..
انا هسه عايز انوم لكن ماعارف هل حانوم على طول ذي مانمتا وشبعتا نوم فى إجازتي دى ولا…!!! لا …!! وأظنو لا !!! ومرات فى الحوش …فى احلى من تعاين للسما وتنوم ….مش بتحس انو حارسك رب السما …!!!
انا اتعشيت الليله بي كل ماتتخيلو ياعلوب عندنا زميلنا كده عازمنا زواجو …!! لكن اقسم ليك صادق …!! لو خيروني بينو وبين ( فول ) محطة سته الاكلناهو مع بعض ..!! لاخترت المحطة ودون تردد …!!! بتصدق ..!! الأكل احساس ياعلوب ….!! وطعم مشاركة …!! الأكل روح ….!!! الله يسعدك ويهنيك …!!
ده ماعتب ياعلوب يا صاحبى وأخوى …!! ده حب .!!! الله يديك وانت فى حتتك دى عشان ماتضطرا تجى هنا …!! شفتا انا بحبك كيف …!! خلي بالك من نفسك ..!! وسلم لي علي كل الشلة ونتلاقي في ساعة خير ….!!!
اخوك أبدا …اليسع محمود الخليفة
أبها ( عسير ) ١٩ ذي القعده ١٤٣٧ الموافق ٢٢ اغسطس ٢٠١٦
اها ياهو ده الجواب ماسكو وقاعد لي ساعه قدام الباب …!! قريتو دى المره التالته …..( اشتقت إليك يايسع اكثر من اي وقت مضى …!!! ليتك كتبته قبل أن تأتي ….!!! جوابك جد صعب وعلى ( عسير )
….!!! الله يقويك ويديك الفى مرادك ..!! ويرد غربتك ..!! وترجع سالم غانم اليسع اخوي …!! ويعدلا عليك محل ماقبلتا …!!!
لم يقطع علي استغراقي هذا الا الصغيرة فطوم .. …جاتنى جاريه قدام الباب قالت لي الوووب ..امى قالت ليك تعال أشرب الشاى مرق…!!! …..!!! بعد شويه الحجه ذاتا كوركت من جوه …الشاى ده ببرد ياولد تعال بى سرعه
( ومازلت عندها ولد ) …!!! صدقت يايسع …!!! مساك سعيد ….ياحبيب الروح !!..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *