“يوميات علوب” (71) … الهادي في المعادي

 غايتو بي هنا بي هنا لمينا قروشنا مشينا القاهره انا والجيلي صاحبي والهادي …قررنا انا لابد ان نحطم القيود وننطلق …!!! الرزق ده قالو داير الخفيه …!!! هو في خفيه اكتر من مصر ..قلنا نجيب بضاعه نحصل بيها العيد ده عارفنو عيد لحم لكن ياهو العيد …!!! يازول وصلنا الي قاهرة المعز حيث الدنيا والعالمين اجرنا لينا شقه صغيره كده في الموسكي قلنا نكون قريبين من السوق ونتخارج بي سرعه …!!! اها نزلنا ليك علي السوق والعالم والنَّاس نسأل من اي حاجه يقول ليك ببلاش …!!! غايتو البركه في الكلمه الحلوه دي عارفنها مكنه لكن والله جدعه حلوه …!! هو الكلام بي قروش …اها الهادي ده جا ليهو مرتين ..!!! مازينا عامل لينا فيها فيها سعد زغلول …!! شابكنا ليك لا هنا بغشوكم وماتمشو بي هنا الحته دي أرخص وهناك البضاعة مغشوشة ..!!! وهنا كانت معركة الاسكندرية …!! والحاجات الكويسه في التحرير …!! عذبنا عذاب …!! اها نحن ساكنين في الطابق التاني وتحتنا طوالي بتاع خدار تديهو حبل من الشباك بختا ليك الخدار تسحبو ذي الدلو من البير تشيل حاجاتك وتخت القروش في الراجع …( مافي هزار هنا اي حاجه عندها حل …) الأسانسير بشتغل ساعه وبقيق ساعتين …!!! ونحن نقول مالا الشقه دي رخيصه كده…!!! اها الهادي صاحبنا ده طبعا ضعييييف كملان من لحم الدنيا بذكرني (فيدو ديدو ) بتاع سفن اب الزمان داك لابس ليها فنله داخليه كده …!! ويجر في الخضار ده من تحت بالحبل لما وصلو عاين كده لقي ليك الخدار ده تعبااان …طماطم معفصه ..!!! وخيار ضبلان بس فتح ليك نار في في سيد المحل ده تحت وهو فوق في البلكونه …!!!! مادي راسو ويهرج ..ده شنو ياحج حسنين انتا قايلنا جايين من وين نحنا …نحنا أهل الخدار لو ماعارف خلي يوروك …!! اكيد (يوروك ) دي حج حسنين ما اتعرف عليها …!! والحركه دي تعملا لي واحد( داقس ) ونحنا شابكنو (ترجم ياهادي ) وهو مواصل ..ايه الاستهبال والحركات الارعه دي (قويه منك الارعه دي ) المهم صرف عربي تقيل شي سوداني وشي مصري …!! وعمك حسنين قاعد تحت يعاين اصلو ولا ردا عليهو بي كلمه يشرب في شيشتو ولا رفع راسو …!!! خلاهو لحدي ماخلص وضربو بالنووي ….!! قال للهادي ده كلمه واحده مازادا …براحه ياعم حاسب تواااع مي الفنله …!!! خلي الهادي ده بتلفت طوالي قفل الشباك ودخل من البلكونه …قال المصريين ديل ماعندهم حل …!! استمتعنا بالمشهد اكتر من الخدار ..!!!
نزلنا ركبنا لينا تكسي وكالعاده الهادي يستلم ليك الونسه قال كان عرفونا جداد بدقسونا …!! لا والكلام مرات بالمصري …!!! نحنا بي ورا الضحك شارطنا …حتي مصري المسلسلات ده غايتو بعمل فيهو عمايل ..!!! قال للسواق …والنبي هيا الدنيا ليه ولعا …!!! (داك بتلفت كمان ) قال ليهو …لانكو منورين ..!! والهادي يعجبك …من اصلك يااسطي …وداك يديهو …تعرف احلي حاقه في السودانيين ايه …قالو ليهو ايه …قال ليهو انكو طيبين ..!! والهادي ينفعل من اصلكو والله
…وبتاع التكسي يرد …!!! لا والله بكلماك بقاد …اصلي انا عاشرت سودانيين كتير اوي ….اقسم بالله اقدع ناس ..!!!
بتعرف النميري ..قال ليهو النميري الواحد ده … الرئيس ..!!! السواق قال ليهو آه ..هوا نفسو …!!! زبوني ..!! وبركب معايا في التكسي ده …!! (المصري ده بدا يفلت) …نطيت انا من ورا قلتا ليهو نميري ده كان رئيس ..!! البركبو تكسي شنو…!!
وإجابتو كانت حاضره ..!!! ما انا عارف ..!! هو انا باوول لكو طيبين ليه …أهو الراجل ده كان رئيس ويركب تكسي …!!! أبل يومين طلع معايا مشوار …!!! كعععععععع ( يومين ) …!! قلنا ليهو نميري ده مات الله يرحمو …قال ماانا ماخلصتش كلامي ابنو اللي كان معايا ….!! الله يرحمو كان راجل طيب ..!! قلنا ليهو اصلو هو ربنا ماقسم ليهو ولد …طوالي شغل لينا أغنيه …!! ولم يستسلم قال كلنا ولادو …!!!
اها وفضلنا ماشين هو والهادي شغالين ون تو لحدي ماوصلنا …اديناهو عشره جنيه …!! تحول طوالي الي أسد…. ايه ده بأشيش ..!! قلنا ليهو كيف يعني ..!! ماهو كلو المشوار خمسه دقايق من هنا لي هنا ….!! قال …لا اكيد بتهزرو ..!!! قلنا ليها مابنهظر ..!! قال طب اقولوكو حاقا خلوها علينا …!! انا طوالي قلتا ليهو كتر خيرك ماقصرتا مقبوله منك …ونزلنا …!! فتح الباب نزل قبالنا ..!!! ايه ياعم انتو حراميا ولا ايه ..!!
( جابت ليها أساءه ) ..!!! قلنا لي انتو مش قلتا
خلوها عليا ….!!! ايه طلعت كداب ..!!! ) فاجأه هذا الاستدراك ….كداب ايه وهباب ايه حتدوني فلوسي ولا اطلع الشومه ادشدش بيها دماغكو ….!!! قلنا ليهو بسسس طلع الشومه ..!!! نحنا ذاتنا دايرين نشوف الشومه دي للدنيا والزمان …!! ( بالطبع لم نتشرف برؤيتها ) .،،لا ده انتو باين شاربين حاقا …!! ده انا حاكلم البوليس ..قلنا
ليهو بسس طوالي كلم البوليس …!!! نشوف ذاتو المشوار ده حقو كم ..!! هوا انتا حاتعرف اكتر من الحكومة …!!! نحنا ذاتو حنقول ليهو الزول ده قال نميري أحسن من السيسي بركب تكسي يعني قصدك السيسي مابركب تكسي صاح …!! انت الظاهر من الجماعه …!! قال لينا هاتو العشره جنيه ياولاد النيل …دمكو خفيف ….!! ادينا العشره جنيه …!!! دور التاكسي اول ما مسك الشارع عاين لينا من الشباك قال ..!!! ياولاد ( الوسخه ) ….!!! رفعنا ليهو الموبايل بتاعو وقع منو لما نزل يدينا بالشومه المزعومه …..!!! والله اخد ليهو وقفه لما حنينا عليهو ..اكيد جاتو جلطه …!!! مشينا عليهو نحنا المره دي …لقيناها جلطه في المحطة ..وحالتو تصعب علي الكافر …!! قلنا ليهو هسه نحنا عادي في كلمتك دي ممكن نهرسك …!! تعرف يعني شنو نهرسك …!!! لكن نحنا حنعمل بي اصلنا وهاك ده موبايلك وتاني ماتعمل كده ..!!! ماقدر يقول كلمه
قال أصل انا مش كان اصدي انتو …انا اولت لبتاع المكروباس
اللي عدا اودامي ده ….!! قلنا ليهو ماشايفين لينا اي ميكروباس بس بنعتدمدا اجابه صحيحه عشان خاطرك ..وهاك ده موبايلك
تاااني قال لينا ماتخلي ياباشا …!! يحلنا الجليل …!!! تحيا مصر !!..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *