“يوميات علوب” (74) … يضحك السمك

تقومي ياملكه اللفيفه ( ملكه وكدا ) تشيلي الكلام بي صمة
خشمو تودي للرضيه بت جبر الزين قالت ليها (سنية ) قالت هي (الرضية ) المبشتنه الما بتشبه النسوان …!! مالا كمان ومال الأكل في المطاعم ..!! ماتنفجخ في بطن البيت وتتسمم …!!
ده كلو لانو الرضية شوهدت وهي ( تضرب ) السمك في احد ( منتجعاته ) التي ملأت العاصمة (فجعتن ) كأنو النيل ده كان جاري في بلد تانية ….!! غايتو ناسنا ديل وكت يقومو علي حاجه بوصلوها الحد …!!! القصة دي كلها بدت بي سمكه واااحده ….!! لكن يبدو انو ( الشبكة ) كبيره…!!!
المهم الرضية تلقت الإشارة من هنا وطوالي عملت وضع استعداد
للرد علي الهجوم …!! المشكلة انو مافي دليل مادي …وملكة لايعتد بشهادتها …!!! لانها عادي بتجلي …!! ومرات بتركب في الموضوع من النص ….!! لكن عموما نوع الكلام ده بشبه (سنيه) …!!
عشان كدا الرضية قررت انها تجري تحقيق في الموضوع وقررت انو تتفق مع (ملكه ) انها تعيد الكلام ده تاني مع المتهمة ( سنيه ) بالتلفون وتسجل ليها المكالمه …!! (ملكة ) قالت ليها.. بري..!!! انا ذاتي مابعرف أسجل..!! (الرضيه ) قالت ليها انا بوريك تسجلي كيف …!!! ولا فلاحتك تسجلي في راسك ده …!!! (ملكه فرفرت …) وكان لابد من الرضوخ للطلب بالتسجيل والا …!! (سنيه ) روسيا قد دَنا عذابها …!!!
المهم علموها كيف تسجل …( والله النسوان ديل ماعرفناهن نسوان حله ساكت طاشات …!!! ولا مخابرات ..!! )
طبعا ملكه دايما متسربعة …!! اتصلت بي (سنيه ) وبدت ليك المباراه ضاغطه وقالت كدا جدعت ليك اسم ( الرضية ) باص كدا بالكعب …!! عشان الكلام يجيب الكلام …!! ولو مني مستني الملام ياسلام عليك …ياسلام …!!! والزهر لو خانو الفراش ما أظن يلومو مع الندي …مابجرح احساسو الجميل مالريدا ياحنين كدا ….!!! اها ناس سنية والرضيه والجماعة ديل لابعرفو ورد لابعرفو ندي …ولا احساسو الجميل ذاتو …!!! ديل جماعة طريقك دايما فارشو ورد …!! وطريقي دايما فارشو شوك …
اها (سنية )نوع الجدعات البدون مناسبة دي مابتفوت عليها وقالت كده استعدلت وختت ليك الكوره دي في سدرا …!!! ونزلتا واطا …!!! وكبت ليك الشعر في الرضية … يايمه الرضية الهديه …!! والرضيه الما مشكيه…!!! والرضيه اللوليه … !!!والرضيه قدام والنسوان ورا ….
وملكة في حالة ذهول من هذا التغير الغريب في المواقف الدوليه …وقالت كده انفعلت…. !! قالت ليها أجي ياسنيه انت ماقلتي في الرضيه دي كدي وكدي وكدي ….(اها سنيه نكرتو حطب…!! ) قالت ليها انا دي ..بري ..بري …بري ….!! تكوني دي انتي …!!
…وملكه غلبا التسوي بس منططه عيونا…..!!! عشان تاني تشيلي الكلام ….!! وشالو الكلام زادوهو حبه ….!! وجابوهو ليك ….!!!
ملكه (لبست ) القضيه كلها …ذكرتني واحد مصري ايام العربيات (اللادا ) ديك جابوها للدكاترا…!! اها في دكتور سميييين كده وسايق العربيه ( اللادا ) دي …المصري داير يوصفو قال للجماعة ….الدكتور( ياغماعه ) اللي لابس (اللادا) …!!
اها خمي وصري ياملكه ..!! لبستي (اللادا) …وفي (القواله ) اخدتي الشهاده ….!! امشي تاني انقلي ليك مباراه …!! المره دي ٠/٦ ….!! وكدا …..!!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *