“يوميات علوب” (77) … العزيزه الما بتسأل

انا طالع من البيت لمحتا السعديه جارتنا دي كأنها مهمومه كده
السعديه دي ام كمال الود الجاب 92.6 %في الشهاده وعملنا ليهو الحفله الفرتقتا أمونه ديك حكيت ليكم قصتا ..!! (يفرتقك أقول عليك شنو ياامونه) …!!
اها ناس السعديه ديل ناس كده في حالم ..!!رحل زوجها وترك لها (كومً ) عيال ..!! تحزمت (السعيدة ) وكبرتم وعلمتم …!! كمال ده الفي النص عندو اختو اكبر منو شغاله مدرسه ..!! واتنين اصغر منو في المدرسه بت وولد ..!!
ناس كده مستورين حال مابتسمع ليهم حس في الحله دي ..!! ومسالمين شديد ..!!البيت الساكنين فيهو ده الحاجه الرحيده الطلعو بيها من الدنيا بيت بسيط كده لكن ضاميهم وساترم ونضيف شديد ..!!(نظافة سرائرهم …) ..!! لو مشتهي تشرب ليك مويه من زير مندي مغطي بي شاش ومن فوقو غتا خشب رويان وكوز (المونيوم) متمر وبلمع ..!!بس امشي ليهم ..!!ستروي ظمأك وتشرب كما لم تشرب من قبل …!! وطوالي البيت ده مفرش ومنظم رغم قلة أثاثه ….!! صورة ابوهم معلقا في (البرندا )وقد انكسر بروازها لكن نظارته السميكة لاتزال جلية وكأنه يراقب المكان ..!! والاهم من ده كلو إنّو الأولاد ديل شطار شديد ومهذبين بحترمو الكبير والصغير …!!
المهم جيت سلمتا عليها ..قلتا ليها كيف يا خالتي السعديه ….!! قالت لي الحمد لله …!! (وهولاء يقترن الحمد باجاباتهم اقتران الشمس بشعاعها) ..!! قبل ماتتمها ..!!حسّيت العبره سادا حلقا …!! عايزه تمشي ..!!جرت توبا ده علي وشها وبكت …!! اي والله بكت ….!! بكت من جوووه …!! وما أغلي دموع الحرائر العفيفات …!!! انا ذاتي اتبرجلتا قلتا ليها خير يالسعديه مالك …!!؟ في شنو ..!!؟
قالت لي مافي حاجه ..!! وتقشقش في دميعاتا ..!! قلتا ليها كيف مافي حاجه انا مازي ولدك …!! في شنو …!!؟ قالت لي وبصوت متقطع …!! الحمل تقل علي شديد ياعلوب ….!! ( أمل ) بتي قالو ليها في المدرسة الشغالة فيها انهم عايزين يقللو العدد ..!! وهي اتخرجت من كلية الفنون ذي ما انت عارف وبتدرس البنات الرسم ..!! اول واحده شالوها …!! هديك راقده حالتا ذي الواطا ..!! قالت مانحنا البنقري فنون ..!!
وانتا عارفا حساسه كيف …!! ابوها الله يرحمو دايما كان بقول لي أمل دي حتطلع فنانه عظيمه ..ويشيل ويجيب ليها في حاجات الرسم ..!! (وهاهو اللون الأسود فقط ماتبقي من علبة الألوان …) ..!! (تذكرت لوحاتها التي تزين جدران منزلهم الوريف …) ..!! …! وانتا عارف ياعلوب انا ياهو بقيت مازي اول وحركتي قلت …!! قدر الحاجات البشتريها وأبيعا بقت غاليه شديد ..!! فوق قدرتي ..!! وماجايبا حقها …..!!
بتصدق ياعلوب كمال التعبتا فيهو ..قال عايز يشتغل ..!!؟
قلتا لي ماعافيه مِنْك كان قلتا كدا تاني ..!! الماببكيني شنو
ياعلوب ..!!! وعادت للدموع …!!
وقفت انا مشدوها لاحول لي ولا قوة …!! (وانا نفسي علي باب الكريم أقف ) ..!! (وما اوسعه من باب …!! قلتا ليها مايهمكً الله في ….!! انا بتصرف …!! (وذهني خالي من اي صرفه …) غير إيماني المطلق انا هذه الدنيا يديرها ملك …!!
ودعتها ودموعها تلاحقني ….!! وكان أقيم مامنحته لي في هذا الصباح ان أقول الحمد لله علي كل حال …!! سعديه الحزينة تمنحني ثباتا ويقين.. الله يسعدك يالسعديه ويفرجا عليك …وين ماقبلتي ..!!وكلي ثقه …!!
لا ادري لماذا قفز الي ذهني صديقي خليل …!! ابو الخل بتعرفوهو (خليل )…!! القال لي (سحر ) خطيبتي دي اهتماماتا سطحية وأنها بتستخف بي نبض (الجماهير) …!! امكن لانو اكتر زول ممكن يشاركني احساس الحزن الانا فيهو ده …!!اتصلتا عليهو قلتا ليهو وين انتا ..!! قال لي انا في مدني …!! عندي حبوبتي كده عيانه مشيت اشوفا …!!! قلتا ليه سلامتا ..!! فيك الخير ..!! قال لي ما اهدتني إياه من قصص وحكايا وهي في شدتها .. يلزمني ان اصلها أينما كانت وهي لاتقوي علي الحراك ….!!وانا لم استغرب الزيارة … !! فقط (لأنه خليل) …!!! قلتا ما احكي ليهو وازيد البيهو ….!! قلتا ليه خلاص تصل بالسلامه لحدي ماتجي ….!! قال لي مالك ياعلوب..!! صوتك ماعاجبني ..!! ؟ حكيت ليه القصه وقلتا ليهو تعبتا نفسيا قلت احكي ليك تشاركني..!! بس ماراجنك تحلها …( ياالوالي ) ..!! ضحك ضحكه فيها غصه ..قال لي البلد اول ماتابا ( الفنون ) معناها عيانه …!! أعجبني التشخيص ) ..!!
اخد ليهو نفس كده..!! وقال لي كدي لما أجي …!!حسّيت بي راحه شويه وذهبت الي حال سبيلي …!! وصورة السعديه لم تفارقني في ذلك المساء (المغبون) ….!! اها بعد يومين اتصل علي خليل قال لي (أمل ) وين ..!!؟ قلتا ليهو (أمل) منو .!!؟ قال لي جنيت ياعلوب ..!! أمل البت الحكيت لي عنهم قبل يومين …!!قلتا ليهو مالا …!!؟ قال لي خليها تمشي المركز الثقافي الفرنسي انا حصلتا ليها وظيفة هناك ..!! (أستاذه فنون ..!! ) وهم قالو اصلا محتاجين …!! انعقد لساني لحظتها …!! قلتا ليه شكرًا ..!! شكرًا ياخليل ..!!خليتو علي الخط ..!! وجريت ناس السعديه …!! دقيت الباب فتح لي كمال ..!! دخلتا لقيت السعديه بتقطع في بصل في الحوش بكل وقارها .!! قلتا ليها وين أمل ..!! أمل وينا..!! قالت لي ياها ديك جوه ..!! خير ياعلوب ..!! نادوها لي ..!!بدت امامي متماسكة وفي عيونها أسي ..!! قلتا ليها مبروك يا أمل ناس المركز الفرنسي دايرنك بالاسم تشتغلي معاهم …!!! وليتكم كُنتُم معي لترو السعديه وقد انقلبت طاولتها علي الارض وقامت لتحضن بنتها في مشهد لايستطيع القلم نقله …لتبكي أمل هذه المره …!! وتدخل مسرعه الي الداخل تنظر الي صورة والدها المعلقه علي الحائط ..!! (أصدقكم القول ..!!كأني رأيت الصورة تبتسم) …!! السعديه قالت لي ان شاءالله ياعلوب الله يفرحك ذي مافرحتني ….!! ويديك لمن يرضيك..!! وتتعلي ماتدلي …!!قلتا ليها كدي النتعلا اول الدلدله ساهله …!!وضحكت السعديه اخيراً ….!!
نظرت انا للسماء وتأملت (الملك )عندما يسوق الرزق من باريس (عاصمة الفنون ) الي الخرطوم عاصمة( اليقين ) …(وقد بدت ضنينة) …ولا عاصم الا الله ….سلام ياخليل..!! صديقي الجميل ….والله يسعدك يالسعديه …اوا لم تسميها أمل …!!!؟

تعليق 1 ““يوميات علوب” (77) … العزيزه الما بتسأل

  • 8 يناير، 2019 at 5:29 مساءً
    Permalink

    رائع أنى حللت.. لك التحية والتقدير

    Reply

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *