يمه من دار الرعايه
داير ارسل ليك هديه
رغم انك مامعايا
وعشت مجهول الهويه
زي سجين محكوم مؤبد
واتحكمت بدون قضيه
مني ليك يايمه زهرة
فايحة بالتحنان نديه
ومني ليك يايمه دعوة
بي صفاء خاطر ونيه
عافي ليك يا امي ذنبك
وانتي برضك اعفي ليا
يمه كل ما شمسي تشرق
الدموع تغمر عيني
نفسي كان اتربي جنبك
وانتي تحكي تحجي فيا
ونفسي كان اتغطي حنك
والقي من عطفك شويه
الا يا امي الحبيبه
تراني عايش في اسيه
بين جدار مافيهو راحه
ومافي زول يشفق عليا
مافي ام في الدنيا غيرك
ام تعرف الوجعة فيا
كل يوم بي ام جديدة
وكلهن مابيسو ليا
ذرة من عطفك وحنانك
ولا ابتساماتك عشيه
يمه كيف العيد معاكي
عايشه اريتك لسه حيه
وعندي اخوان تاني منك
كان وليد او كان بنيه
سلميلي عليك وليهم
يمه بلغي التحيه
ويمه رغم البي وحاتك
منتظر منك وصيه
وخلي بالك منك اكتر
وماتشيلي الهم عليا
الف مبروك يمه عيدك
وكل عام الصحة ميه