حوم كل البلاد عرب العجم وافارقة
حددا من أغادير ومر بالخليج والشارقة
انحنا محال شبيهنا لا احتمال لا بارقة
في طيبنا وصفانا وشموخنا العلامة الفارقة
في السودان عموم العزة هيلنا قديمة
الباشا الترك شوينا اكلنا وليمة
مملكة الانجليز سارعنا في تهديما
كم جنرال عظيم صبحنا بتو يتيمة
ما بنرضى الحقارة ولا القوارير يبكن
بنقدل بى ثبات يوم الخيول يدبكن
بعرفنا العدو ساعة الجيوش يتشبكن
والجاهل قدرنا ندكو دكن دكن
ظاهرين نار تبق كان الخلق شكوهم
ناس عرب الخليج نادونا يوم سكوهم
الحوث في اليمن فرسانا كم دكوهم
دمار وخراب ديار أسرى الرياض فكوهم
الدنيا ام قدود غالبنها الغشاشة
ما عندنا زول امير لا باش ولا ود باشا
الغني والفقير عايشين سماح وبشاشة
وفي الواجبات نفز قايمين تشيلنا هواشة
كتير فى الغربة نصبر شان نساعد أهلنا
والفي ايدنا نديها وقروشنا بهلنا
الطالبنو حق نعفا ويعيش ف مهلنا
والجاهلنا يوم نزعل بعرفو جهلنا