سأحاول أن أجيب على هذا السؤال بدون الخوض في مصطلحات إقتصادية معقدة..
أصبحنا نتعارف على مدى تدهور إقتصادنا المحلي وفقا لسعر صرف الدولار الأمريكي مقابل الجنيه السوداني..
في الواقع هذه المعادلة مختلة إقتصاديا..
فليس بالضرورة أن يرتفع سعر صرف الجنيه مقابل الدولار لينتعش الإقتصاد..
من الممكن إنعاش الإقتصاد بطرق سهلة أخرى..
لكن كبداية..
المشكلة الإقتصادية الكبرى التي تواجهنا هي “التضخم”..
لنبسط الأمر:
التضخم هو كالأتي: فلنفترض إن السودان هو قرية صغيرة تعتمد على تجارة الفحم مثلا..
هنا سيكون هناك قيمتان إقتصاديتان.. الفحم.. والنقد. (القروش الواحدة دي)..
فيجب أن تكون كمية النقد مساوية للسعر الحقيقي للفحم.. (يعني لو في قروش مطبوعة بقيمة مليون جنيه في كل القرية.. لازم يكون الفحم الفي القرية قيمتو الحقيقية مليون جنيه)..
يعني لو الفحم ده 100 شوال مثلا.. معناها الشوال قيمتو 10 جنيه..
لكن لو حصل و زادت كمية النقد بدون تزيد كمية الفحم .. مثلا بقى النقد مليون و نص.. تلقائيا شوال الفحم حيبقى ب 15 جنيه..
هنا العملية الحصلت دي هي (التضخم)..
للوهلة الأولى حتشوفها بسيطة وما مؤثرة.. لكن خت في بالك إنو (الفحم) هنا كان مجرد مصدر الدخل.. لكن أكيد سكان القرية ما بياكلو فحم و لا بلبسو فحم.. ولا بتعالجو فحم..
شوال الفحم هنا بمثل مقياس إقتصادي للقرية(في الحقيقة القروش هي مجرد ورقة مطبوعة)..
يعني مثلا لو كشف الدكتور ب30 جنيه.. فهو في الحقيقة ب3 شوال فحم..
فلمن يحصل تضخم و الشوال يبقى ب15 كشف الدكتور حيبقى ب45 جنيه..
فحنلقا إنو كل المشاكل الإقتصادية في القرية سببها الرئيسي إنو في عملة نقدية زيادة إتطبعت..
و للأسف طباعة عملة جديدة ده إجراء إعتيادي بتلجأ ليهو الحكومات في كل العالم..
لكن..
بقابل زيادة طباعة العملة.. زيادة موارد..
يعني زيادة طباعة عملة لازم يحصل معاهو زيادة إنتاج فحم..
عشان ما يكون في تضخم..
طبعا ما محتاج أوضح إنو التضخم عندنا في أعلى مستوياتو..
طيب و بالنسبة لموضوع الدولار البرتفع .. وين من القصة دي؟
ماشي..
الدولار هنا بتعامل معاملة سلعة..
في الحقيقة معظم التعاملات المالية في العالم بتم وفق الدولار.. يعني لو داير تشتري عجلات من الهند.. حيقولو ليك يا تدفع بالهندي يا بالدولار.. وطبعا عشان تدفع بالهندي لازم تشتري روبية هندية بالدولار.. يعني في النهاية حتدفع بالدولار..
الهند بتشيل دولارك ده تمشي تشتري بيهو لبن من هولندا .. وهولندا بتشيل دولارات الهند تشتري بيها لاعب من البرازيل.. البرازيل بتعمل بالدولارات بتاعت هولندا مدرسة كرة قدم تطلع ليها 10 لعيبة تبيعهم لأسبانيا بالدولار.. وكده..
نحنا بقى محتاجين يكون عندنا حاجة بنبيعها للعالم بالدولار.. عشان نرجع دولاراتنا الأولى..
في حالة ما عندنا (وده الحاصل حاليا) ما بكون عندنا حل غير نسوق العجلات ونقيف سداري..