قصيدة نمل السكر

يا ﻛﻮﻡ ﺍﻟﻨﻤﻞ ﺳﻜﺮﻧﺎ ﻭﻳﻦ ﻭﺩﻳﺘﻮ
ﺳﻔﻴﺘﻮ ﻭﻣﻌﺎﻙ ﺍﻟﺸﻌﺐ ﻃﺎﻟﻊ ﺯﻳﺘﻮ
ﻋﻨﺪﻱ ﺍﺣﺴﺎﺱ ﻋﻤﻴﻖ ﻣﻊ ﺍﻧﻲ ﻣﺎ ﺑﺎﺭﻳﺘﻮ
ﺍﻟﺴﻜﺮ ﻳﻜﻮﻥ .. ﻧﻘﻠﻮ ﺍﻟﻨﻤﻞ ﻟﻲ ﺑﻴﺘﻮ

ﻓﻲ ﻫﺬﺍ ﺍﻟﻮﻃﻦ ﻳﺎ ﺍﺧﻮﺍﻧﺎ ﻟﻠﺘﺎﺭﻳﺦ
ﺍﻟﻔﻴﺮﺍﻥ ﺑﺘﺎﻛﻞ .. ﻓﻲ ﺍﻟﻜﺒﺎﺭﻱ ﺍﻟﺴﻴﺦ
ﺍﻟﻠﻴﻤﻮﻥ ﺭﻗﺪ ﻭﺍﺗﻌﺰﺯ ﺍﻟﺒﻄﻴﺦ
ﻭﺍﻟﻌﺠﺐ ﺍﻟﻨﻤﻞ ﺧﻼﻫﻮ ﺷﺎﻫﻴﻨﺎ ﻣﺴﻴﺦ

ﻧﺤﻦ ﺍﻭﻻﺩ ﺑﻠﺪ … ﻓﻴﺮﺍﻧﺎ ﻟﻠﻌﻴﻦ ﺗﻤﻠﻲ
ﺷﻮﺍﻟﻨﺎ ﺍﻟﻐﻠﻴﺪ ﻋﺎﺩﻱ ﺑﺘﻘﻮﻣﺒﻮ ﺍﻟﻨﻤﻠﺔ
ﺍﺻﻼ ﻣﺎ ﺑﻌﻴﺪ ﺑﺎﻛﺮ ﺗﺠﻴﻨﺎ ﺍﻟﻘﻤﻠﺔ
ﺑﺘﺴﻒ ﺍﻟﺪﻗﻴﻖ ﻭﺗﺸﻦ ﻋﻠﻴﻨﺎ ﺍﻟﺤﻤﻠﺔ

ﻳﺎ ﻧﻤﻞ ﺍﻟﺒﻠﺪ … ﻭﺭﻳﻨﺎ ﻭﻳﻦ ﺍﻟﺴﻜﺮ
ﺧﻠﻴﺖ ﺍﻻﻟﻢ ﺟﻮﺓ ﺍﻟﻀﻠﻮﻉ ﻳﺘﺤﻜﺮ
ﺍﻟﺨﻼﻧﻲ ﺍﺗﺎﻣﻞ ﻛﻤﺎﻥ ﻭﺍﺗﻔﻜﺮ
ﺍﻟﺸﻮﺍﻝ ﺩﺍ ﻛﻴﻒ ﺑﺘﺴﻔﻮ ﻧﻤﻠﺔ ﺳﻜﺮ

ﺍﺭﺑﻌﻤﻴﺔ ﻗﺎﻟﻮ ﻭﺯﺍﺩﻭ ﻓﻮﻗﻦ ﺣﺒﺔ
ﺷﻮﻻﺕ ﻣﻌﺒﺎﺓ ﻭﺍﻗﻔﺔ ﺯﻱ ﺍﻟﺼﺒﺔ
ﻳﺎ ﺍﺧﻮﺍﻧﺎ ﺍﻟﻨﻤﻞ ﻣﻌﺮﻭﻑ ﺑﻴﺎﺧﺪ ﺣﺒﺔ
ﺷﻮﺍﻝ ﺫﺍﺗﻮ ﻛﻴﻒ ﺟﻮﺓ ﺍﻟﺤﺠﻮﺭ ﻳﺘﺨﺒﻲ

ﺍﻟﺴﻜﺮ ﻗﻄﻊ .. ﻻ ﺷﺎﻱ ﻭﻻ ﺑﺴﺒﻮﺳﺔ
ﻭﺍﻟﺠﺒﻨﺎﺕ ﺧﻼﺹ ﺳﺒﻨﺎﻫﺎ ﻣﺎ ﺑﻨﻜﻮﺳﺎ
ﺑﺎﻏﺎﺕ ﺍﻟﺰﻳﻮﺕ ﺑﻜﺮﺓ ﺍﻟﺒﺠﻴﻨﺎ ﻳﺪﻭﺳﺎ
ﺍﻭﻋﻲ ﺗﻘﻮﻟﻮ ﻟﻴﺎ .. ﻭ ﺍﺳﺄﻟﻮ ﺍﻟﻨﺎﻣﻮﺳﺔ

Leave a Reply

Your email address will not be published. Required fields are marked *

error: Content is protected !!